Լիբանանը կարող է «սահմանադրական քաոսի» մեջ գլորվել։ Այս մասին Reuters-ին ասել է Լիբանանի հեռացող նախագահ Միշել Աունը՝ նշելով, որ իր պաշտոնի համար թեկնածուներ չկան, եւ նախարարների կաբինետը ժամանակավոր կկատարի գործառույթները։
Աունը նախագահական պալատը պատրաստվում է լքել կիրակի օրը՝ իր պաշտոնավարման վեցամյա ժամկետի ավարտից մեկ օր առաջ, սակայն պառակտված ազգային խորհրդարանի չորս նստաշրջաններ չեն կարողացել կոնսենսուսի հասնել նրան փոխարինող թեկնածուի շուրջ:
Քանի որ Լիբանանը նախկինում բախվել է երկարատեւ նախագահական վակուումի, երկիրն այժմ գտնվում է աննախադեպ իրավիճակի եզրին՝ նախագահի թափուր տեղով եւ սահմանափակ լիազորություններով ժամանակավոր կաբինետով:
Աունի խոսքով՝ սահմանադրական ճգնաժամը լուծելու քաղաքական քայլը դեռ հնարավոր է, բայց «չկա վերջնական որոշում», թե դա ինչ կարող է նշանակել:
Նրա փեսա Ջեբրան Բասիլը, որը 2020 թվականին ընդգրկվել էր ԱՄՆ պատժամիջոցների ցուցակում՝ ենթադրյալ կոռուպցիայի համար, նախագահական հավակնություններ ունի։
Աունը շաբաթ օրն ասել է, որ պատժամիջոցները չեն խանգարի Բասիլին ի վերջո դառնալ նախագահի թեկնածու: «Հենց նա ընտրվի (նախագահ), պատժամիջոցները կհանվեն»,- ասել է Աունը՝ մանրամասներ չներկայացնելով։
Իր պաշտոնավարման վերջին շաբաթվա ընթացքում Աունը ԱՄՆ միջնորդությամբ ստորագրել է Իսրայելի հետ Լիբանանի հարավային ծովային սահմանը սահմանազատելու մասին համաձայնագիր՝ համեստ դիվանագիտական բեկում, որը թույլ կտա երկու երկրներին բնական գազ արդյունահանել ծովային հանքավայրերից:
Նա նշել է, որ գործարքն օգնել է «բացել աչքերը» եւ կարող է լինել Լիբանանի «վերջին հնարավորությունը»՝ վերականգնվելու եռամյա ֆինանսական աղետից հետո, որը արժեցել է արժույթի 95 տոկոսը եւ աղքատության մեջ է գցել բնակչության 80 տոկոսին: