Իրանի անվտանգության ծառայությունները Շիրազ քաղաքում Շահ Չերախի դամբարանի վրա զինված հարձակման մեջ կասկածվող վեց անձի են ձերբակալել երկուշաբթի օրը, ասվում է Իսլամական Հանրապետության տեղեկատվության (հետախուզության) նախարարության հաղորդագրության մեջ։
«Բարդ գործողության ընթացքում հայտնաբերվել եւ ձերբակալվել է զինված հարձակման երկրորդ մասնակիցը, ինչպես նաեւ սրբավայրում (Շահ Չերախը Շիրազում) ահաբեկչական հարձակման եւս 6 կասկածյալներ»,- մեջբերում է Tasnim գործակալությունը նախարարության հայտարարությունը։
Չորեքշաբթի՝ հոկտեմբերի 26-ի երեկոյան, իրանական լրատվամիջոցները հայտնել էին, որ երեք անհայտ անձինք կրակ են բացել Իրանի հարավում գտնվող Շիրազ քաղաքի Շահ Չերախի դամբարանի տարածքում։ Tasnim գործակալությունը հայտնել էր, որ միայն մեկ մարդ է հարձակվել, սակայն, ինչպես նշել է Իրանի պետական հեռուստաալիքը, եղել է նաեւ երկրորդ ահաբեկիչը, որը դամբարանից ոչ հեռու է գտնվել։ Ահաբեկչության հետեւանքով, ըստ լրատվամիջոցների, զոհվել է 13 մարդ, եւս 45 մարդ վիրավորվել է։