Ստամբուլում տեղի ունեցած ահաբեկչությունից հետո հիվանդանոցներից դուրս է գրվել 71 վիրավոր, ընդհանուր առմամբ՝ պայթյունի հետեւանքով տուժել է 81 մարդ, հայտնել է առողջապահության նախարար Ֆահրեթթին Կոջան։

«Իսթիքլալ փողոցում տեղի ունեցած պայթյունի հետեւանքով տուժածների վիճակի մասին վերջին տվյալները հետեւյալն են՝ 81 վիրավորներից բուժումն ավարտված եւ դուրս գրվածների թիվը հասել է 71-ի։ Բաժանմունքում շարունակվում է 8 վիրավորների բուժումը։ Երկու պացիենտ գտնվում է վերակենդանացման բաժանմունքում։ Մեր բուժաշխատողները հնարավոր ամեն ինչ անում են»,- Twitter-ում գրել է Կոջան։

Անցած կիրակի ցերեկը Ստամբուլի կենտրոնում գտնվող հետիոտնային Իսթիքլալ փողոցում պայթյուն է որոտացել, որի հետեւանքով վեց մարդ զոհվել է, 81-ը վիրավորվել է: Հարձակման մեջ կասկածվողը ձերբակալվել է, նա խոստովանել է, որ կապեր ունի Թուրքիայում արգելված Քրդստանի աշխատավորական կուսակցության (PKK) հետ: Թուրքիայի ՆԳՆ ղեկավար Սուլեյման Սոյլուն կասկածներ է հայտնել, որ ահաբեկչական հարձակման մասին ցուցումը գալիս է Սիրիայից, եւ հանցագործը թուրքական տարածք է մտել Աֆրին քաղաքով։ Սոյլուն ասել է, որ իր երկրի իշխանությունները չեն ընդունում ԱՄՆ դեսպանատան ցավակցությունները հարձակման կապակցությամբ։