Կարող ենք ինչ ուզենք, առաջարկենք, բայց Ադրբեջանը համարում է, որ դու իր տարածքում առաջարկում ես, թե ինքն ինչ անի. Ինքը դա չի անելու: Այս մասին, այսօր՝ նոյեմբերի 21-ին, NEWS.am-ի հետ զրույցում նշեց Արցախի ՊԲ նախկին հրամանատար Սամվել Բաբայանը՝ անդրադառնալով նրան, որ Արցախն ու Հայաստանը Ադրբեջանին առաջարկել են Արցախի շուրջը ապառազմականացված գոտի ստեղծել:
«Դա խոսակցություն է խոսակցության համար»,-ասաց նա:
Անդրադառնալով Ջալալ Հարությունյանի պաշտպանի հայտարարությանը, թե Լելե Թեփեի օպերացիայից Նիկոլ Փաշինյանը տեղյակ է եղել, սակայն այս պահին միայն Ջալալ Հարությունյանն է կալանավորված, արդյոք Փաշինյանը եւս չպետք է ներգրավվի, Բաբայանը պատասխանեց, որ ինքը որեւէ բանից տեղյակ չէ:
Դիտարկմանը, որ մամուլում գրվել է, որ ինքն է կազմել այդ օպերացիայի պլանը, նա արձագանքեց. «Ով ասում է, գլուխը պատին է խփում: Խորհուրդ կտամ մարդիկ, որոնք շատ հեռու են բանակից, բայց գեներալի ուսադիրներ են կրում, քիչ խոսեն: Որովհետեւ ինչքան խոսում են, այնքան ապացուցում են, որ ապուշ են: Խնդիրն այն է, որ այն, ինչից ես եմ տեղյյակ, դա գյուղ Հորադիզի ուղղությունն է: Լելե Թեփեն այդտեղից 10 կմ թիկունք է: Եթե դդուք դա համարում եք Լելե Թեփե, ես այդպես չեմ համարում: Ես գիտեմ, որ Լելե Թեփեի ուղղությամբ առանձին օպերացիա է եղել: Հիմա դուք որից եք խոսում, ես տեղյակ չեմ»:
Հարցին՝ եթե վարչապետը տեղյակ է եղել, արդյոք չի նշանակում, որ օպերացիան համաձայնեցված է եղել վերեւից, Սամբել Բաբայանն ասաց. «Համաձայնեցված է եղել գյուղ Հորադիզի ուղղությամբ օպերացիան: Ներկա է եղել վարչապետը այդ խոսակցությանը, բայց համաձայնությունը եղել է ԳՇ-ի հետ: Շտաբի պետք է որոշում կայացնում պատերազմի ժամանակ, ըստ օրենքի: Այդտեղ ես ընդհանրապես, խնդիր չեմ տեսնում»:
