Շրջափակումը յուրահատուկ քննությունն էր, որը ցույց տվեց, թե ճգնաժամի ընթացքում ով արագորեն կարողացավ ընդգրկվել նոր ստեղծված աշխատանքային պայմաններում, ով է պատրաստ աշխատել՝ պահելով ամենօրյա այս տեմպը։ Այս մասին Արցախի Հանրապետության Հանրային հեռուստաընկերությանը տված հարցազրույցում ասել է Արցախի պետնախարար Ռուբեն Վարդանյանը:
«Մտադիր էինք մինչեւ դեկտեմբերի վերջ գույքագրում անել, հասկանալ ընդհանուր իրավիճակը, եւ հունվարին արդեն հանգիստ ձեւավորել նոր կառավարության մոդելն ու ընդհանուր թիմը, բայց ճգնաժամն ամեն ինչ փոխեց: Կան պաշտոններ, որտեղ միանգամից պետք էր նշանակումներ անել, օրինակ՝ առողջապահության նախարարի պարագայում։ Ուղղակի հասկանալի է, որ ճգնաժամային իրավիճակում պետք է ավելի արագ որոշումներ կայացվեն եւ թիմը ձեւավորվի՝ թիմային մոտեցումով խնդիրների լուծման բանաձեւը գտնելու համար: Նոր իրավիճակը նոր մոտեցումներ է պահանջում: Եթե մենք ուզում ենք անկախ Արցախում ապրել, պետք է ավելի օպերատիվ, ավելի ճկուն արձագանքենք՝ լուծումներ գտնելով տարբեր մարտահրավերների համար»,- նշել է Վարդանյանը:
Վարդանյանի խոսքով՝ ստեղծված ճգնաժամն իր համար կանխատեսելի էր դեռ ամռանը,եւ այդ պատճառով էլ ինքը եկավ Արցախ, սակայն ճգնաժամը սկսվեց ավելի շուտ, քան իր պատկերացրած փոփոխությունները կլինեին:
«Ճգնաժամի ընթացքում ամեն ինչ փոխվում է, քաղաքական կյանքն այլեւս նույն կերպ չի լինում, եւ շատ կարեւոր է այստեղ Օպերատիվ շտաբի դերը: Այնտեղ են ԱԺ-ից, պետական մարմիններից, ոստիկանությունից ներկայացուցիչներ, որոնց միջեւ բաժանված են տարբեր տեսակի հարցեր: Խնդիրները շատ են՝ բաժանված ընտանիքներ, միայնակ մնացած երեխաներ, սնունդ, բենզին, բուժում: Մենք փորձում ենք արագ գտնել այս ամենի լուծումը, բայց դա էլ հեշտ չէ, որովհետեւ պահ է գալիս, որ երկու վատ տարբերակների միջեւ պետք է ընտրես ավելի քիչ վատ տարբերակը: Հարցի լուծումը չենք գտել»,- ասել է նա:
Ռուբեն Վարդանյանը առանձնացնում է քաղաքացիների դերը, որոնք չնայած դժվարություններին, հավատով ու լավատեսությամբ լցված պայքարում են:
«Ես շատ շնորհակալ եմ այն մարդկանց, որոնք մեզ միացել են թե Արցախում, թե Արցախից դուրս: Ուզում եմ նորից ասել արցախցիներին՝ եթե տեսնում եք, որ ինչ-որ բան չի գործում, մեզ հետ կապվեք, մենք կփորձենք լուծել հարցը եւ պատժել մարդկանց, որոնք կխախտեն խաղի կանոնները»,- ընդգծել է Վարդանյանը:
