![](img/news/74/52/02/default.jpg)
Եվրախորհրդարանը բանաձեւ է հրապարակել՝ Վրաստանի իշխանություններից պահանջելով ազատ արձակել նախկին նախագահ Միխայիլ Սաակաշվիլուն։
Բանաձեւում ասվում է, որ «մարդասիրական նկատառումներով եւ քաղաքական բեւեռացումը նվազեցնելու համար» հարկավոր է ազատ արձակել նախկին նախագահին եւ թույլ տալ նրան պատշաճ բուժում անցնել արտասահմանում, հաղորդում է DW-ն։
Բանաձեւին կողմ է քվեարկել 577 պատգամավոր, դեմ՝ 33-ը, ձեռնպահ՝ 26-ը, հաղորդում է «Новости-Грузия»-ն։
Եվրապատգամավորները նշում են, որ «նախկին նախագահի վիճակի բարելավման հարցում մշտական անհաջողությունները» ԵՄ-ին անդամակցելու համար Վրաստանի թեկնածության հեռանկարների հետաձգման ռիսկ են ստեղծում։
Կոչ է արվում պատժամիջոցներ սահմանել Վրաստանի իշխող կուսակցության հիմնադիր, միլիարդատեր Բիձինա Իվանիշվիլու դեմ: Փաստաթղթում ընդգծվում է Իվանիշվիլու դերը նախկին նախագահին կալանավորելու գործում՝ որպես «անձնական վրեժխնդրության մաս»։
Միխայիլ Սաակաշվիլին ձերբակալվել էր 2021 թվականի աշնանը, երբ ապօրինի հատել էր սահմանը եւ վերադարձել Վրաստան։ Բանտում նրա առողջական վիճակը վատացել է։