Իրանի ատոմային էներգիայի կազմակերպության ներկայացուցիչ Բեհրուզ Քամալվանդին կիրակի հերքել է երկրում 60 տոկոսից ավելի ուրանի հարստացման մասին լուրը, տեղեկացրել է IRNA-ն։
Ինչպես տեղեկացրել է Bloomberg գործակալությունը, Ատոմային էներգիայի միջազգային գործակալության (ԱԷՄԳ) տեսուչները եկել են այն եզրակացության, որ Իրանին հաջողվել է հասնել ուրանի մինչեւ 84 տոկոս հարստացման։ Մեկնաբանելով այս լուրերը՝ Քամալվանդին ափսոսանք է հայտնել, որ գործակալությունը վերածվել է քաղաքական գործիքի, որպեսզի ճնշում գործադրվի Իրանի վրա։
«Bloomberg-ի հրապարակումն արվել է անվանարկման եւ փաստերն աղավաղելու նպատակով»,- նշել է նա։
Նրա խոսքով՝ 60 տոկոսից ավելի ուրանի մասնիկների առկայությունը հարստացման պրոցեսում չի նշանակում 60 տոկոսից ավելի հարստացում։ «Այդ հարցը շատ բնական է հարստացման պրոցեսում, որը կարող է առաջանալ անգամ ցենտրիֆուգների փոխանցման միաժամանակյա նվազման դեպքում։ Բայց կարեւոր է վերջնարդյունքը, եւ Իրանի Իսլամական Հանրապետությունը մինչեւ այժմ չի փորձել ուրանը 60 տոկոսից ավելի հարստացնել»։
Իրանի ատոմային էներգիայի կազմակերպության ներկայացուցիչը հայտարարել է, որ ԶԼՄ-ներում նման հարցեր բարձրացնելը մեկ անգամ եւս ցույց է տվել, որ, ցավոք, ԱԷՄԳ-ն հեռացել է իր մասնագիտական եւ չեզոք դիրքորոշումից եւ տեխնիկական տեղեկություն է հաղորդում արեւմտյան ԶԼՄ-ներին։