Պլաստիկի թափոնների վերացման խնդիրն օրեցօր սրվում է։ Ալիկանտեի համալսարանի գիտնականներն առաջարկել են խնդրի լուծման իրենց տարբերակը։ Մշակվել է ջրում լուծվող նյութի ստեղծման տեխնոլոգիա այնպիսի հատկություններով, որոնք նման են պլաստիկին, հիմքը կարտոֆիլի օսլան է։
Համավարակից առաջ, հիշեցրել են իսպանացի գիտնականները Ալիկանտեի համալսարանի կայքի հրապարակման մեջ, աշխարհը սպառում էր մոտ 370 մլն մետրիկական տոննա պլաստիկ։ Պլաստիկի թափոններն աղտոտել են ընդերքը, դրա մասնիկների «ամպերը» կախված են օդում, ծովերում, օվկիանոսներում լողում են հսկայական սինթետիկ կղզիներ։
Իսպանացի մասնագետներն այլընտրանք են առաջարկել. Էկոլոգիական, բիոքայքայվող նյութ՝ պլաստիկի սպառողական հատկություններով։ Այն կարելի կլինի օգտագործել փաթեթավորման համար՝ առանց մարդուն եւ բնությանը վնաս հասցնելու։ Այն հեշտ կլինի վերացնել, անգամ օգտակար կարող է լինել գյուղատնտեսության համար, եթե օգտագործվի որպես պարարտանյութի բաղադրամաս։
Նոր նյութը հատկություններով նման է ցածր խտության պոլիէթիլենին։ Փափուկ օսլան բավական խիտ եւ ամուր կառույցի վերածելու համար այդ նյութը ենթարկել են դոնդողացման եւ պլաստիֆիկացման։ Այդ գործողությունները նպատակ ունեն նաեւ կանխել պրոցեսի «հետադարձը»՝ նախնական կառույցի մասնակի վերականգնումը։
