Շվեդիայի խորհրդարանը մարտի 22-ին որոշում կընդունի ՆԱՏՕ-ին անդամակցելու վերաբերյալ։
Արտաքին գործերի խորհրդարանական կոմիտեն Ռիկսդագի պատգամավորներին առաջարկել է պաշտոնապես հավանություն տալ ՆԱՏՕ-ին Շվեդիայի անդամակցությանը եւ Հյուսիսատլանտյան պայմանագրի կազմակերպության կարգավիճակի մասին համաձայնագրին, որը կարգավորում է իմունիտետի եւ արտոնությունների հարցերը ինչպես ՆԱՏՕ-ի, այնպես էլ նրա անձնակազմի առանձին կատեգորիաների համար: Խորհրդարանի պաշտոնական հաստատումը պարտադիր պայման է ռազմական դաշինքին Շվեդիայի անդամակցության համար, ընդգծվում է հաղորդագրության մեջ:
Այն դեպքում, երբ թագավորության՝ ՆԱՏՕ-ին միանալու հայտում բացակայում են որեւէ վերապահումներ, խորհրդարանական կոմիտեն, ինչպես եւ կառավարությունը, ելնում է նրանից, որ Շվեդիան, ինչպես եւ սկանդինավյան մյուս երկրները, պատճառներ չունի խաղաղ ժամանակ իր տարածքում միջուկային զենք կամ ռազմակայաններ տեղակայելու համար:
Խորհրդարանի մամուլի հաղորդագրության մեջ ասվում է, որ ՆԱՏՕ-ին անդամակցությունը ենթադրում է որոշակի փոփոխություններ ազգային օրենսդրության մեջ, մասնավորապես երկու օրենքներում ՝ օպերատիվ ռազմական օգնության մասին օրենքը եւ առանձին դեպքերում անձեռնմխելիության եւ արտոնությունների մասին օրենքը: Մի կողմից դա կհեշտացնի դաշինքի ռազմական օգնության համար դիմելը, մյուս կողմից՝ ՆԱՏՕ -ին եւ նրա ազգային եւ օտարերկրյա ներկայացուցիչներին իմունիտետ եւ արտոնություններ կտրամադրի, որոնք նշված են կարգավիճակի մասին համաձայնագրում ։ Օպերատիվ ռազմական օգնության մասին օրենքը պետք է աջակցի պատգամավորական կորպուսի առնվազն երեք քառորդը, քանի որ խոսքը վերաբերում է լիազորություններն այլ պետությանը փոխանցելուն։
Երկու խորհրդարանական կուսակցություններ դեմ են ՆԱՏՕ-ին անդամակցությանը։ Նրանք կարծում են, որ դաշինքին անդամակցելը նշանակում է Շվեդիայի համար անվտանգության քաղաքականության հետ կապված իրավիճակի վատթարացում եւ մեծացնում է այն ռիսկը, որ Շվեդիան կդառնա ՆԱՏՕ-ի երկրների կողմից վարվող պատերազմների եւ հակամարտությունների մասնակից: Շվեդիան պետք է շարունակի հավատարիմ մնալ Չմիավորման քաղաքականությանը, կարծում են նրանք։
