Նախագահ Վլադիմիր Պուտինը հայտարարել է, որ Ռուսաստանը ստիպված կլինի արձագանքել Ուկրաինային սպառված ուրանով արկերի մատակարարմանը, քանի որ Արեւմուտքը սկսում է միջուկային բաղադրիչով զենք օգտագործել, փոխանցում է ՏԱՍՍ-ը։
Այսօր ավելի վաղ ԱԳ նախարար Սերգեյ Լավրովը հայտարարել էր, որ Ռուսաստանը պատրաստ է Ուկրաինային սպառված ուրանով հրթիռների հնարավոր փոխանցմանը։ Նրա խոսքով՝ այդ գործողություններն անխուսափելիորեն կհանգեցնեն բացասական հետեւանքների, հաղորդում է «Коммерсантъ»-ը։
«Ես չեմ զարմանա իրադարձությունների նման զարգացումից, եթե այդ առաքումն իրականում տեղի ունենա, բայց կասկած չկա, որ դա վատ կավարտվի նրանց համար»,- ասել է Ռուսաստանի արտաքին քաղաքականության գերատեսչության ղեկավարը ВГТРК-ի լրագրող Պավել Զարուբինին:
Ավելի վաղ Մեծ Բրիտանիայի պաշտպանության նախարար Անաբել Գոլդին հայտարարել էր, որ երկիրը պատրաստ է Ուկրաինային սպառված ուրանով արկեր մատակարարել։ Նա ասել էր, որ առաքումները կիրականացվեն Challenger 2 տանկերի հետ մեկտեղ: Նրա խոսքով, սպառված ուրանով արկերը կարող են «արդյունավետորեն խոցել ժամանակակից տանկերն ու զրահամեքենաները»:
