Ուկրաինայում տիրող իրավիճակի հարցով խաղաղ ծրագրերի իրականացումն առայժմ անհնար է, քանի որ Կիեւը չի կարող չհնազանդվել իր կուրատորներին, որոնք պնդում են, որ պատերազմը շարունակվի։ Այս մասին լրագրողներին ասել է ՌԴ նախագահի խոսնակ Դմիտրի Պեսկովը:
«Ինքը՝ ՌԴ նախագահը, ասել է, որ քննարկել է բուն ծրագիրը, դրա առանձին դրույթները, բայց տեղին չէ համեմատել այդ երկու գաղափարները։ Ես նկատի ունեմ այն, ինչ հնչեցրել է Չինաստանի նախագահը եւ այն, ինչի մասին խոսում է նախագահ Լուկաշենկոն»,-ասել է Պեսկովը՝ պատասխանելով հարցին, թե հրադադարի որ ձեւաչափն է (Բելառուսի կամ Չինաստանի առաջարկած ձեւաչափը) Կրեմլում նախընտրելի համարվում։
Պեսկովը նաեւ հայտարարել է, որ Պեկինի ծրագիրն այժմ չի կարող իրագործվել:
«Այդ ծրագրի որոշ դրույթներ ներկայումս իրագործելի չեն՝ կապված ուկրաինական կողմի՝ իր կուրատորներին, իր հրամանատարներին չհնազանդվելու ցանկության, ավելի ճիշտ՝ անհնարինության հետ։ Իսկ այդ հրամանատարները, ինչպես գիտենք, Կիեւում չեն նստում եւ պնդում են, որ պատերազմը շարունակվի»,-հավելել է նա։
Չինաստանի իշխանությունները փետրվարին առաջարկել են իրենց խաղաղ ծրագիրը։ Այն ներառում է 12 կետ, այդ թվում՝ հրադադարի կոչեր, անվտանգության ոլորտում բոլոր երկրների օրինական շահերը հարգելու, Ուկրաինայում հումանիտար ճգնաժամի կարգավորման կոչեր։ ՌԴ նախագահ Վլադիմիր Պուտինի խոսքով՝ չինական խաղաղ ծրագրի շատ կետեր կարող են կարգավորման հիմք ընդունվել, երբ դրան պատրաստ լինեն Արեւմուտքում եւ Կիեւում:
Ավելի վաղ Բելառուսի նախագահ Ալեքսանդր Լուկաշենկոն՝ ուղերձով դիմելով ժողովրդին եւ խորհրդարանին, առաջարկել է դադարեցնել ռազմական գործողություններն Ուկրաինայում եւ հրադադար հայտարարել: