Սոթքի դիրքերի ուղղությամբ ադրբեջանական կրակոցների հետևանքով ունենք 4 վիրավոր, նրանց երկուսի վիճակը բավարար է, երկուսինը՝ միջին ծանրության, նրանց կյանքին վտանգ չի սպառնում: Այս մասին այսօր՝ մայիսի 11-ին, կառավարութունում լրագրողների հետ զրույցում ասաց ՀՀ առողջապահության նախարար Անահիտ Ավանեսյանը։
«Նշված 4 զինծառայողները տարբեր տիպի վիրավորումներ են ստացել՝ բեկորային։ Նրանք դեռ Երեւանում չեն, եթե կարիքը լինի, նոր կիրականացվի տեղափոխում»,–ասաց նախարարը։
Անդրադառնալով Ադրբեջանի ԶՈւ–ի կողմից այսօր շտապօգնության մեքենայի թիրախավորման դեպքին նախարարը նշեց, որ միջազգային բոլոր հարթակներն օգտագործվելու են նմանատիպ դեպքերի մասին բարձրաձայնելու և հետագայում միջազգային դատարանների դիմելու համար։
Ավելի վաղ NEWS.am-ը հայտնել էր, որ Ադրբեջանի ԶՈՒ ստորաբաժանումները ժամը 06.00-ից հրետանային և ականանետային միջոցներից կրակ են բացել Սոթքի ուղղությամբ տեղակայված հայկական դիրքերի ուղղությամբ:
ՀՀ զինված ուժերի ստորաբաժանումները ձեռնարկում են համապատասխան պաշտպանական-կանխարգելիչ միջոցառումներ: Հայկական կողմն ունի 4 վիրավոր:
Ժամը 10-ի դրությամբ Սոթքի ուղղությամբ լարվածությունն էականորեն նվազել է: