Ռուսաստանի պաշտպանության նախարարությունում հայտնել են, որ ռուս զինվորականները խփել են ութ անօդաչու, որոնցով Կիեւը նախատեսում էր գրոհել Մոսկվայի օբյեկտները, տեղեկացրել է «Ինտերֆաքսը»։
«Այսօր առավոտյան Կիեւի վարչակարգը նախաձեռնել է ահաբեկչական գրոհ անօդաչու թռչող սարքերով Մոսկվա քաղաքի օբյեկտների դեմ։ Գրոհին մասնակցել է ութ անօդաչու սարք՝ ինքնաթիռի տիպի։ Հակառակորդի բոլոր անօդաչուները խոցվել են»,- նշվել է ՌԴ ՊՆ-ի հաղորդագրությունում։
Ռազմական գերատեսչությունում նշել են, որ երեք անօդաչու խփվել է ռադիոէլեկտրոնային պայքարի միջոցներով, դրանք կորցրել են կառավարումը եւ շեղվել թիրախներից։ Եվս հինգ անօդաչու խփվել է զենիթահրթիռահրանոթային «Պանցիր-Ս» համալիրով Մերձմոսկվայում։
Ավելի վաղ Մոսկվայի քաղաքապետ Սերգեյ Սոբյանինը տեղեկացրել էր, որ մայիսի 30-ի առավոտյան Մոսկվայում «անօդաչուի գրոհի հետեւանքով մի քանի շենքերում տեղի են ունեցել չնչին վնասումներ»։ Բուժօգնության համար դիմել է երկու մարդ, ոչ մեկը հոսպիտալացվելու կարիք չի ունեցել։
Մոսկվայի մարզի նահանգապետ Անդրեյ Վորոբյովն իր հերթին տեղեկացրել է, որ երեքշաբթի առավոտյան Մոսկվային մոտենալիս խփվել են մի քանի անօդաչուներ։
Ինչպես «Ինտերֆաքսին» տեղեկացրել են արտակարգ ծառայությունների աշխատակիցները, մայրաքաղաքում եւ մարզում կործանվել են մի քանի անօդաչուներ։ Դրանց մի մասն ընկել է բնակելի տների վրա։ Մեկը պայթել է 25-րդ հարկի մակարդակում, Ատլասովի փողոցի բազմաբնակարան շենքում (Նովայա Մոսկվա), երկուսն ընկել են բնակելի տների վրա Պրոֆսոյուզնայա փողոցում եւ Լենինի պողոտայում։