Հայաստանում 1565 ուսուցիչ, ըստ կամավոր ատեստավորման արդյունքների, արդեն ստանում է բարձր աշխատավարձ եւ պարգեւավճար։ Այս մասին Ազգային ժողովում մայիսի 31-ին 2022 թվականի պետական ​​բյուջեի կատարողականի հաշվետվության քննարկման ժամանակ մշտական ​​խորհրդարանական հանձնաժողովների համատեղ նիստում հայտարարեց Հանրապետության կրթության, գիտության, մշակույթի եւ սպորտի նախարար Ժաննա Անդրեասյանը։

Նրա խոսքով, սա ծրագրի շահառուների ընդհանուր թվի 5,5 տոկոսն է։

«Միջինում աշխատավարձերը կրկնապատկվել են։ Այսպիսով, եթե մինչ այդ ուսուցիչների միջին դրույքը  կազմում էր 125 հազար դրամ, ապա այժմ այն ​​հասել է 250-300 հազար դրամի»,- ասաց Անդրեասյանը։

Այնուամենայնիվ, ինչպես նշեց նախարարը, դրա համար պետք է իշխանությունների նախաձեռնած ինքնակամ ատեստավորումն անցնել։

Նա հայտնեց նաեւ, որ ատեստավորմանը մասնակցած ուսուցիչների 28 տոկոսի աշխատավարձը բարձրացվել է մինչեւ 300 հազար դրամ եւ ավելի։

«Հիմա մենք կամավոր ատեստավորման դիմումների ընդունման գործընթացում ենք։ Գործընթացը կշարունակվի մինչեւ հուլիսի 15-ը։ Այս պահին ստացվել է ավելի քան 3600 դիմում»,- ասաց կառավարության ներկայացուցիչը։