Երևանում մեկնարկել է եվրաինտեգրմանը նվիրված թվով հինգերորդ տարեկան միջազգային համաժողովը՝ «Արեւելյան գործընկերություն. արդյո՞ք այն նոր փուլ է ազդարարում եվրաինտեգրման գործընթացում» խորագրով։
«Մարդկային զարգացման միջազգային կենտրոն» ՀԿ ջանքերով կազմակերպված ու արդեն ավանդական դարձած սույն միջոցառմանը մասնակցում են հեղինակավոր փորձագետներ և պաշտոնյաներ Հայաստանից, Վրաստանից, Ուկրաինայից, Մոլդովայից, Բուլղարիայից, Լիտվայից, Ռուսաստանից, Բելգիայից ինչպես նաեւ ներկայացուցիչներ ԵՄ, ԵԱՀԿ, ԵԽ և ՆԱՏՕ-ի միջազգային կառույցներից։
Համաժողովին ողջույնի խոսքով հանդես է եկել ՀՀ Ազգային անվտանգության խորհրդի քարտուղար Արթուր Բաղդասարյանը։Հ ամաժողովին որպես հիմնական զեկուցողներ ելույթ են ունեցել ՀՀ ԱԳ նախարար Էդվարդ Նալբանդյանը, Էկոնոմիկայի նախարար Ներսես Երիցյանը, Լիտվայի ԱԳ փոխնախարար Էվալդաս Իգնաթավիչիուսը ու մի շարք այլ հայ եւ օտարերկրյա պաշտոնյաներ։
«Մարդկային զարգացման միջազգային կենտոն»-ը արդեն 5-րդ անգամ է կազմակերպում նման ներկայացուցչական համաժողով",- ասել է կենտրոնի գործադիր տնօրեն Թեւան Պողոսյանը։ «Նման միջոցառումները կառավարության յուրօրինակ հաշվետվություն են հանրությանը՝ Եվրաինտեգրման ճանապարհին իրականացրած կոնկրետ քայլերի վերաբերյալ։ Դրանք նաեւ եվրոպական կառույցներին մեր երկրի ինտեգրման պատրաստության մակարդակը իրապես գնահատելու հնարավորություն են», եզրակացրել է նա։
Համաժողովն իրականացվում է Հայաստանում Եվրոպական հանձնաժողովի պատվիրակության, Ֆրիդրիխ Էբերտ հիմնադրամի և Սևծովյան հիմնադրամի օժանդակությամբ։