Տասնյակ ակտիվիստներ, այդ թվում՝ բնիկ սաամի ներկայացուցիչներ, ուրբաթ օրը բողոքի ակցիա են անցկացրել Նորվեգիայի վարչապետ Յոնաս Գար Ստերեի գրասենյակի մոտ՝ խոստանալով արգելափակել մուտքը՝ Նորվեգիայի կառավարությանը հիշեցնելու համար, որ նրանք ցանկանում են ապամոնտաժել հողմակայանը, քանի որ, ըստ նրանց, այն վտանգում է հյուսիսային եղջերուների ապրելակերպը, հայտնում է Associated Press-ը:
Փետրվարին նույն իրավապաշտպանները չորս օրով արգելափակել էին նավթի եւ էներգետիկայի նախարարության մուտքերը, իսկ ավելի ուշ ՝ նաեւ 10 նախարարությունների մուտքերը։ Այնուհետեւ Նորվեգիայի կառավարությունը ներողություն է խնդրել անգործության համար՝ չնայած Գերագույն դատարանի որոշմանը՝ հօգուտ սաամիի:
Ակտիվիստները նախատեսում են վարչապետի աշխատասենյակի մոտ գիշերել մինչեւ շաբաթ օրը՝ 600-րդ օրը, այն բանից հետո, երբ Գերագույն դատարանը որոշեց, որ հողմակայանը խախտում է սաամիների իրավունքները:
Վեճի կենտրոնում 151 տուրբին է գտնվում Ֆոսեն շրջանում՝ Եվրոպայի ամենամեծ առափնյա հողմակայանում՝ Օսլոյից մոտ 450 կիլոմետր դեպի հյուսիս: 2021 թվականի հոկտեմբերին Նորվեգիայի Գերագույն դատարանը որոշում է կայացրել, որ տուրբինների կառուցումը խախտել է սաամիների իրավունքները, որոնք դարեր շարունակ օգտագործել են հողը հյուսիսային եղջերուների բուծելու համար:
Հողմաղացները դեռ աշխատում են։ Ակտիվիստները նշում են, որ «կանաչ» էներգիայի անցումը չպետք է իրականացվի ի վնաս բնիկ ժողովուրդների իրավունքների:
