Ուկրաինայի ԱԳ նախարար Դմիտրի Կուլեբան հայտարարել է, որ Ուկրաինան պետք է անդամակցի ՆԱՏՕ-ին առանց անդամակցության գործողությունների ծրագրի, հաղորդում է «ՌԻԱ Նովոստի»-ն։
«Մենք հավատում ենք, որ անդամակցության գործողությունների ծրագրն այլեւս չպետք է համարվի տարր՝ անդամակցության ճանապարհին։ Դա մեխանիզմ է, որն իրեն սպառել է եւ չպետք է կիրառվի Ուկրաինայի նկատմամբ»,-ասել է նա Էստոնիայի ԱԳ նախարար Մարգուս Ցահքնայի հետ ասուլիսում։
Կուլեբայի խոսքով՝ Կիեւում հասկանում են, որ Ուկրաինան ՆԱՏՕ-ի անդամ չէ եւ չեն կարող որոշումներ թելադրել դաշինքին: «Բայց մենք լիովին իրավունք ունենք պայքարելու Եվրաատլանտյան անվտանգության համար, նույնիսկ դեռ ՆԱՏՕ-ի անդամ չլինելով»,-նշել է նա։ Կուլեբան պնդում է, որ առանց Ուկրաինայի հնարավոր չէ պաշտպանել եվրատլանտյան տարածքը, ուստի դաշինքին Կիեւի անդամակցությունն անխուսափելի է:
2022 թվականի սեպտեմբերի վերջին Վլադիմիր Զելենսկին հայտնել է, որ Ուկրաինան արագացված կարգով ՆԱՏՕ-ին անդամակցելու հայտ է ներկայացնում։ Նման ընթացակարգի անցկացումը ժամանակավրեպ է, ավելի ուշ նշել է ԱՄՆ նախագահի՝ ազգային անվտանգության հարցերով օգնական Ջեյք Սալիվանը։ Կուլեբայի խոսքով՝ Ուկրաինային չի գոհացնի Վիլնյուսում կայանալիք ՆԱՏՕ-ի գագաթաժողովի ոչ մի այլ որոշում, բացի դաշինքին անդամակցելու հրավերից:
