Նոյեմբերի 3-ին ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանն ընդունել է ԵՄ խորհրդատվական խմբի թիմի ղեկավար Ռոլֆ Բյոնկեի եւ Հայաստանում Եվրահանձնաժողովի պատվիրակության Հարեւանության քաղաքականության բաժնի ղեկավար Ուֆֆե Հոլստ Յենսենին: Նրանք քննարկել են Արեւելյան գործընկերության խորհրդարանական ձեւաչափի` «Եվրանեսթ»-ի մեկնարկային համաժողովին եւ ՀՀ ԱԺ-ում ԵՄ խորհրդատուի նշանակմանն առնչվող հարցեր:
Ինչպես NEWS.am-ը տեղեկանում է ԱԺ հասարակայնության հետ կապերի վարչությունից, Ն. Զոհրաբյանը ընդգծել է, որ «Եվրանեսթ»-ը նոր բաժանարար գծեր չպետք է ստեղծի, այլ պետք է փորձի տարածաշրջանում նպաստել համագործակցությանը եւ զարգացմանը: Նրա գնահատմամբ` խորհրդարանական ձեւաչափը կդատապարտվի անհաջողության, եթե փորձ արվի տարածաշրջանային կոնֆլիկտները բերել օրակարգ, այնինչ Ադրբեջանը հայտարարում է, թե չի պատրաստվում Արեւելյան գործընկերության ձեւաչափում համագործակցել Հայաստանի հետ: Ադրբեջանի ներկայացուցիչը Ստոկհոլմում եւս ոչ կառուցողական դիրքորոշում է ցուցաբերել` պահանջելով «Եվրանեսթ»-ում քննարկել տարածաշրջանային հակամարտություններ, մասնավորապես՝ ԼՂ հիմնախնդիրը:
Անդրադառնալով ՀՀ ԱԺ-ում ԵՄ խորհրդատուի նշանակման խնդրին` ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը կարեւորել է, որ թեեւ ուշացումով, բայց ՀՀ ԱԺ-ն եւս կունենա ԵՄ խորհրդատու, քանի որ եվրոպական ինտեգրման կարեւոր խնդիրներից է ՀՀ օրենսդրության համապատասխանեցումը եվրոպական չափորոշիչներին:
Ռոլֆ Բյոնկեն եւ Ուֆֆե Հոլստ Յենսենը, տեղեկացրել են, որ ԱԺ-ում նշանակված ԵՄ երկու խորհրդատուները ունեն խորհրդարանական բազմամյա փորձ: Հետաքրքիր է իմանալ, թե ինչ խորհրդատվություն պետք է տա այդ ԵՄ խորհրդատուն, ասենք մեր խորհրդարանի բիզնեսմեն պատգամավորներին, որոնք ոչ միայն որեւէ օրենդրական նախաձեռնությամբ հանդես չեն եկել ԱԺ-ում, այլ նաեւ երբեւէ ելույթ չեն ունեցել:
