ՀԴԲ տնօրեն Քրիստոֆեր Ռեյը նախազգուշացրել է, որ ՀԱՄԱՍ-ի հարձակումը Իսրայելի վրա կարող է «ոգեւորել» «ծայրահեղականներին» ԱՄՆ-ում եւ այլուր, գրել է Axios-ը։
Ռեյը ելույթ է ունեցել Սենատի ներքին անվտանգության եւ կառավարության գործերի կոմիտեում։
Նրա խոսքով՝ «բազմաթիվ օտարերկրյա ահաբեկչական կազմակերպություններ կոչ են արել հարձակվել ամերիկացիների եւ Արեւմուտքի վրա»։
Նա նշել է, որ ԱՄՆ-ում ամենակարեւոր խնդիրն այն է, որ «ռազմատենչ ծայրահեղականները՝ առանձին անձինք եւ ոչ մեծ խմբեր, կոգեւորվեն Մերձավոր Արեւելքի իրադարձություններից, որպեսզի հարձակումներ գործեն ամերիկացիների վրա»։ «Դա ներառում է նաեւ հայրենական ծայրահեղականներին, որոնք թիրախավոել են հրեական կամ մուսուլմանական համայնքները»,- ասել է Ռեյը։ Նա ավելացրել է, որ «ամերիկացիների պաշտպանությունը ահաբեկչության սպառնալիքից եղել եւ մնում է մեր թիվ մեկ առաջնահերթությունը»։
Ավելի վաղ այս ամիս Իլինոյսից մի տղամարդու 6-ամյա մուսուլման տղայի սպանության մեղադրանք էր ներկայացվել։ Նա երեխային դանակահարել էր, իսկ նրա մայրը ծանր վիրավորումներ էր ստացել հարձակման հետեւանքով, որը, ոստիկանության կարծիքով, կապված է Իսրայելի եւ ՀԱՄԱՍ-ի պատերազմի հետ։
Ռեյը հիշատակել է նաեւ Հյուսթոնում անցած շաբաթ ձերբակալված տղամարդուն, որն ինտերնետում տեղեկություն էր տեղադրել, որ աջակցում է հրեաների սպանություններին։
Իսրայելում եւ Գազայում մարտական գործողություններն անհանգստություն են առաջացրել ԱՄՆ հրեական եւ մուսուլմանական համայնքների դեմ ատելության հողի վրա, հանցագործություններն այս ուղղությամբ կտրուկ ավելացել են։
Հակադիֆամացիոն լիգայի վերջին հաշվետվությունը ցույց է տվել, որ ԱՄՆ-ում նկատվում է հակասեմականության դեպքերի ավելացում։