Նախագահ Սերժ Սարգսյանի պետական այցը ՌԴ շարունակվում է նախատեսված ծրագրին համապատասխան:
Սերժ Սարգսյանը Մոսկվայից շտապ ցավակցական հեռագիր է հղել Թուրքիայի Հանրապետության նախագահ Աբդուլահ Գյուլին` Թուրքիայի տարածքում տեղի ունեցած երկրաշարժի կապակցությամբ:
Հեռագրում, մասնավորապես, ասված է.
«Մեծարգո՛ պարոն նախագահ,
Ցավով տեղեկացա Վանում տեղի ունեցած ուժեղ երկրաշարժի հետեւանքով առկա ավերածությունների, զոհերի եւ փլատակների տակ մնացած մարդկանց մասին: Ցավում եմ տեղի ունեցածի համար, ցավակցում եմ եւ հայտնում եմ Ձեզ, որ Հայաստանի փրկարարների մասնագիտացված ստորաբաժանումը պատրաստ է սեղմ ժամկետում հասնել էպիկենտրոն եւ անհապաղ անցնել փրկարարական աշխատանքների»:
Ավելի վաղ NEWS.am-ը հայտնել էր, որ Հայաստանի նախագահ Սերժ Սարգսյանը ՌԴ նախագահ Դմիտրի Մեդվեդեւի հրավերով այսօր` հոկտեմբերի 23-ին եռօրյա պետական այցով ժամանել է Մոսկվա: Սերժ Սարգսյանն ու առաջին տիկինը Ռուսաստանում կլինեն մինչեւ հոկտեմբերի 25 –ը:
Վաղը` հոկտեմբերի 24-ին կսկսվի այցի հիմնական մասը: Բարձր մակարդակով հայ-ռուսական բանակցությունները եւս նախատեսված են հոկտեմբերի 24-ին, որից հետո տեղի կունենան ընդլայնված կազմով բանակցություններ: Հայաստանի արտգործնախարարն ավելի վաղ տեղեկացրել էր, որ այցի ընթացքում կստորագրվեն վեց-յոթ նոր փաստաթղթեր: Բացի այդ, Սարգսյանը դասախոսությամբ հանդես կգա Մ. Լոմոնոսովի անվան Մոսկվայի պետական համլսարանում եւ ծաղկեպսակ կդնի Անհայտ զինվորի շիրիմին: ՀՀ նախագահի ծրագրում փոփոխություններ չեն լինի:
