Իրաքի իսլամական դիմադրությանը պատկանող շիա զինյալ ստորաբաժանումները հրթիռակոծել են Սիրիայի Դեր Զոր նահանգի Կոնիկո գազային հանքավայրի մոտ գտնվող ամերիկյան ռազմաբազան։ Այս մասին Telegram ալիքում հայտնել է շիական «Հեզբոլլահ» կուսակցության մամուլի ծառայությունը։
Նրա տեղեկություններով՝ ամերիկյան ռազմական ճամբարի վրա հարձակման ժամանակ օգտագործվել են անօդաչու թռչող սարքեր։ Նշվում է, որ հակառակորդի բոլոր ցամաքային թիրախները խոցվել են:
Նոյեմբերի 5-ին շիա անօդաչու թռչող սարքերը հարձակվել են Հասաքայի վարչական կենտրոնի մերձակայքում գտնվող Թել Բեյդարի և Քեսրեքի ամերիկյան բազաների վրա (Դամասկոսից 620 կմ հեռավորության վրա)։ Իրաքում հրթիռակոծվել է Հարիրի ավիաբազան, որը գտնվում է Էրբիլի վարչական կենտրոնից հյուսիս (Բաղդադից 425 կմ հեռավորության վրա)։ Այս հարձակումների հետեւանքների մասին տեղեկություններ չեն հաղորդվում։
Նույն օրն ԱՄՆ պետքարտուղար Անտոնի Բլինկենը Բաղդադ կատարած այցի ժամանակ Իրաքի վարչապետ Մուհամմեդ ալ-Սուդանիից պահանջել է պատասխանատվության ենթարկել ամերիկյան բանակի վրա շարունակվող հարձակումների մեղավորներին։ Նրա խոսքով՝ Իրաքի կառավարությունը պետք է կատարի իր պարտավորությունները՝ պաշտպանելու բոլոր օբյեկտները, որտեղ տեղակայված են ամերիկյան զորքերը։
