Իրանի կառավարությունը Իսրայելին պատասխանատվության ենթարկելու նպատակով հայցեր է նախապատրաստում միջազգային դատական ատյաններում՝ Դամասկոսում Իսլամական Հանրապետության դեսպանատան հյուպատոսական բաժնի վրա հարձակման համար, որի հետևանքով զոհվել է 13 մարդ, նրանց թվում՝ յոթ իրանցի ռազմական խորհրդական։ Դրա մասին հայտարարել է Իրանի դատական իշխանությունների պաշտոնական ներկայացուցիչ Մասուդ Սեթայեշին։
«Դամասկոսում Իրանի հյուպատոսության վրա սիոնիստական ռեժիմի հարձակման առնչությամբ միջազգային դատական ատյաններին հայց ներկայացնելը Կառավարության և արտաքին գործերի նախարարության պարտականությունն է»,- նշել է ԻԻՀ պաշտոնական ներկայացուցիչը:
Նա հավելել է, որ արտգործնախարարն ու նախարարության աշխատակիցները երկրի նախագահի աշխատակազմի իրավաբանական վարչության հետ համատեղ պատրաստվում են հայցեր ներկայացնել միջազգային դատական մարմիններին։
Ըստ IRNA գործակալության՝ Սեթայեշին ընդգծել է, որ դատարանների բողոքարկումը կիրականացվի Իսրայելի կողմից Դամասկոսում Իրանի դեսպանատան հյուպատոսական բաժնի հրթիռակոծմանը Իրանի ռազմական պատասխանին զուգահեռ։
Մասուդ Սեթայեշին չի հստակեցրել, թե Թեհրանը միջազգային որ դատական ատյաններին է մտադիր հայցեր ներկայացնել։