Իրանի ԱԳՆ պաշտոնական ներկայացուցիչ Նասեր Քանաանի Չաֆին սուտ է անվանել ԱՄՆ ԶՈւ Կենտրոնական հրամանատարության հայտարարություններն այն մասին, որ ամերիկյան ՌՕՈւ վերջին գրոհների հետեւանքով Սիրիայում եւ Իրաքում խոցվել են Իրանի Իսլամական հեղափոխության պահապանների կորպուսի (ԻՀՊԿ) մեջ մտնող «Ալ-Քուդս» հատուկ նշանակության ուժերի դիրքերը։
«Ամերիկայի մեղադրանքները սուտ են, եւ նա չի կարող դրանք օգտագործել իր գործողություններն արդարացնելու համար, որոնք խախտում են ՄԱԿ Կանոնադրությունը եւ տարածաշրջանի երկրների տարածքային ամբողջականությունը»,- ասել է Քանաանին ամենշաբաթյա մամուլի ասուլիսում։
Փետրվարի 3-ին Իրանի ԱԳՆ ներկայացուցիչը հայտնել էր, որ Իրանը վճռականորեն դատապարտում է Իրաքին եւ Սիրիային ԱՄՆ հասցրած հարվածները եւ դրանք համարում է ռազմավարական սխալ, որը կհանգեցնի լարվածության ուժեղացման տարածաշրջանում։
ԱՄՆ Կենտրոնական հրամանատարության տվյալներով՝ փետրվարի 3-ի գիշերը ամերիկյան ավիացիան խոցել է ավելի քան 85 թիրախ՝ ԻՀՊԿ-ի մեջ մտնող «Ալ-Քուդս» հատուկ նշանակության ուժերի եւ նրանց հետ կապված խմբավորումների դիրքերին հարվածելու արդյունքում, Իրաքի եւ Սիրիայի սահմանային մի շարք շրջաններում։ Այդ հարվածները կատարվել են ի պատասխան Սիրիա-հորդանանյան սահմանին, Էթ Թանֆ շրջանում արեւմտյան կոալիցիայի ռազմակայանը գրոհելու, որի հետեւանքով զոհվել էր երեք ամերիկացի զինծառայող, 40 հոգի վիրավորվել էր։ ԱՄՆ-ն եւ ՆԱՏՕ-ն պատասխանատվությունը դրել են շիա զինված խմբավորումների վրա, որոնք, նրանց կարծիքով, աջակցվում են Թեհրանի կողմից։
