Հայաստանը գործնականում սառեցրել է Ռուսաստանի բոլոր պետական կառույցների հետ համագործակցությունը: Այս մասին NEWS.am-ի հետ զրույցում նշեց ռազմական փորձագետ Հայկ Նահապետյանը:
Նա հիշեցրեց, որ Հայաստանի ԱԽ քարտուղար Արմեն Գրիգորյանը արդեն հայտարարել է, որ չի մեկնելու եւ չի մասնակցելու ԱՊՀ երկրների ԱԽ քարտուղարների նիստին:
«Այս ամենը Հայաստանն անում է, որովհետեւ անվտանգային ճարտարապետություն է փոխում: Ինչ վերաբերում է 102-րդ ռազմաբազային, Հայաստանը մինչեւ 2018 թվականը տարածաշրջանում եւ աշխարհում կարեւորագույն 4 կռվան ուներ. նախ դա հայկական Արցախն էր, որը հիմա չկա: Երկրորդը Սյունիքն է, որի հյկական լինելու հանգամանքը վտանգված է: Երրորդը 102-րդ բազան է, 4-րդը ատոմակայանն է: Փակել ատոմակայանը, նշանակում է Հայաստանը նստեցնել ադրբեջանական գազի ասեղի վրա: Դա նշանակում է, որ Ադրբեջանը ցանկացած պահի կարող է գազի ծորակը փակել եւ իր պայմանները պարտադրել:
102-րդ ռազմաբազան խնդրահարույց է Արեւմուտքի համար, որովհետեւ Հարավային Կովկասը պետք է օգտագործվի Ռուսաստանի եւ Իրանի դեմ որպես թիկունքային ապահովման տարածք՝ երեք հանրապետություններով: Այս ամենին խանգարում է 102-րդ ռազմաբազան»,- ասաց Հայկ Նահապետյանը: