Hyundai Motor-ը որոշել է վաճառել Սանկտ Պետերբուրգում գտնվող իր ռուսական գործարանը, որտեղ արտադրությունը դադարեցվել է, հաղորդում է Yonhap գործակալությունը։

Կարգավորողին ներկայացված փաստաթղթի համաձայն՝ ընկերության ղեկավարությունը դեկտեմբերի 19-ին հավանություն է տվել Սանկտ Պետերբուրգի գործարանի բաժնետոմսերը վաճառելու առաջարկին։ Գնորդը կլինի ռուսական Art-Finance ընկերությունը։ Գործարանը դադարեցրել է արտադրությունը 2022 թվականի մարտին՝ Ուկրաինայում հատուկ ռազմական գործողության մեկնարկից հետո։

Ավելի ուշ հայտնի դարձավ, որ Hyundai Motor-ի տնօրենների խորհուրդը համաձայնության է եկել Սանկտ Պետերբուրգի գործարանը Art-Finance-ին վաճառելու ծրագրի շուրջ։ Գործարքը հաստատման վերջնական փուլում է, ՏԱՍՍ-ին հայտնել են ընկերության մամուլի ծառայությունում։

«Այսօր՝ դեկտեմբերի 19-ին, Hyundai Motor-ն անցկացրել է տնօրենների խորհրդի նիստ, որի ժամանակ համաձայնեցրել է Սանկտ Պետերբուրգի Hyundai Motor Manufacturing Rus (HMMR LLC) գործարանի իր մասնաբաժինը ռուսական Art-Finance LLC-ին վաճառելու պլանը: Hyundai-ն այս պահին ավարտում է Art-Finance-ի հետ գործարքը»,- հայտնել են մամուլի ծառայությունից։

Նշվում է, որ Hyundai Motor-ը կշարունակի Ռուսաստանում Hyundai-ի հաճախորդներին տրամադրել հետվաճառքային սպասարկում և այլ աջակցություն: