Ես չեմ համարում, որ Արցախի կառավարությունը կարող է ռումբ դառնալ ՀՀ իշխանության տակ. դա չափազանցություն է, բայց պետք է հասկանալ, թե Արցախի իշխանությունների պահպանումով ինչ խնդիր ենք ուզում լուծել: Այս մասին NEWS.am-ի հետ զրույցում նշեց Արցախի ԱԽ նախկին քարտուղար Սամվել Բաբայանը:
«Արցախի իշխանություններն այսօր պետք է ինտենսիվ բանակցությունների մեջ մտնի Ադրբեջանի հետ, հասկանա՝ ինքը հնարավորություն ունի՞ ժողովրդին վերադարձնելու Արցախ, եւ ինչ կարգավիճակով: Եթե դա բացառված է, ապա պետք է մտածի, ՀՀ իշխանության հետ բանակցություններ վարի, որ ժողովուրդը կարողանա տների խնդիրը լուծել, գյուղացիները գյուղերում տեղավորվեն, ոչ թե ցրված ամբողջ Հայաստանով մեկ: Ես ասել եմ, որ կարող են Սյունիքում գյուղերը բնակեցնել արցախցիներով, խելացի գյուղեր կառուցել եւ դրանով ամրացնել Զանգեզուրը: Իսկ Ստեփանակերտ քաղաքի բնակիչներին պետք է տեղավորել Երեւանին կից մի թաղամասում: Սա է իմ մոտեցումը: Ես կառաջարկեի, որ կառավարությունը զաբաղվեր այս խնդիրներով»,-ասաց նա:
Սամվել Բաբայանը կրկնեց իր առաջարկը, որ կարելի է ստեղծել մի վարչություն, որի մեջ կլինեն պատգամավորներ, համայնքապետեր, եւ այդ մարմինը զբաղվի արցախցիների բոլոր խնդիրների կարգավորման հարցերով. «ՀՀ իշխանությունները սպասողական վիճակում են: Իմ մոտ տպավորություն է, որ ՀՀ իշխանությունը դեռ չգիտի՝ արցախցիները վերադառնալու են, թե մնալու են: Երեւի դա է պատճառը, որ իրենք որոշումներ չեն կայացնում»,-ասաց նա:
