Ռուսաստանի քաղաքական, դիվանագիտական եւ զինվորական ղեկավարությանն ուղղված բազմաթիվ հարցեր կան։ Այս մասին դեկտեմբերի 20-ին լրագրողների հետ զրույցում ասել է «Հայաստան» խմբակցության պատգամավոր, դանշակցական Գեղամ Մանուկյանը։
Սակայն, նրա խոսքով, այդ հարցերը պետք է լուծվեն երկխոսության միջոցով, այդ թվում ՀԱՊԿ հարթակում։ Պատգամավորը վստահություն է հայտնել, որ հենց այդպես պետք է լուծվեն հարցերը, ոչ թե նեղանան։ Նա, սակայն, ՀԱՊԿ գործունեությունն անվանել է անարդյունավետ։ «Դրա համար անհրաժեշտ էր արմատապես փոխել քաղաքականությունը՝ կազմակերպությանն ստիպելով ավելի գործուն աշխատել։ Դրա փոխարեն Հայաստանի վարչապետ Նիկոլ Փաշինյանը ձգտում է վատացնել առանց այդ էլ վատ հարաբերությունները Ռուսաստանի հետ, իսկ հետո մեղադրել Մոսկվային այն բանում, որ հենց նա է լարվածություն ստեղծում հարաբերություններում։ Երբ հակառակորդը առաջ գնաց Սյունիքի մարզի Տեղ գյուղում, ո՞վ դրա պատասխանը տվեց։ Ինչո՞ւ դա տեղի ունեցավ։ Չէ՞ որ Լավրովը չէր դրա մեղավորը»,- նշել է Մանուկյանը։
Նրա գնահատմամբ՝ Փաշինյանի համար բոլորը մեղավոր են՝ իրենից բացի։ Խորհրդարանականը հիշեցրել է, որ նոյեմբերի 9-ի փաստաթղթում դրված են երեք երկրների՝ Հայաստանի, Ադրբեջանի եւ Ռուսաստանի ղեկավարների ստորագրությունները։
«Բայց ի՞նչ արեց Հայաստանը։ Ինչ-որ պահի նա ձեռքերը լվաց եւ հայտարարեց, որ այդ երեք ստորագրություններից կարեւոր է միայն Ռուսաստանի նախագահ Վլադիմիր Պուտինի ստորագրությունը։ Հայաստանին չհաջողվեց պնդել այն պարտավորությունների կատարումը, որոնք դրված էին Ադրբեջանի առջեւ։ Հենց այդ ձախողումները հանգեցրին նրան, ինչ կա այսօր»,- ասել է Մանուկյանը։
Հայաստանի իշխանությունների առաջարկած «Խաղաղության խաչմերուկը» նա անվանել է տնտեսապես չհիմնավորված։ «Բացի այդ, այսպես կոչված երկաթուղին Կարսից մինչեւ Հայաստանի սահման պարզապես չկա, այն պետք է նորից կառուցել»,- նշել է ընդդիմադիր պատգամավորը։
