ԱՄՆ արժեթղթերի եւ բորսաների դաշնային հանձնաժողովը հավանություն է տվել ETF առաջին բորսայական բիթքոին-ֆոնդերին, որոնք հետեւելու են բիթքոինի սփոթային գնին։ Այս մասին նշվել է հանձնաժողովի գրավոր հայտարարությունում։
Իշխանությունները հավանություն են տվել կանոնների փոփոխություններին, որոնք թույլ կտան ստեղծել ETF բորսայական ֆոնդեր։ Այս որոշումը ներդրողներին կրիպտոարժույթի հասանելիություն կապահովի։ Այսպիսով, բիթքոինը կգնանշվի բորսաներում, ինչը նրան հնարավորություն կտա հայտնվել ներդրումային պորտֆելներում՝ արժեթղթերի եւ պարտատոմսերի հետ միասին։
Մոտ մեկ տասնամյակ ԱՄՆ իշխանությունները հրաժարվում էին հավանություն տալ ETF ֆոնդերին՝ շուկաների մանիպուլացման մտավախություն ունենալով։
Երեքշաբթի X (նախկին Twitter) ցանցում կեղծ տեղեկություն էր հայտնվել հանձնաժողովի կողմից, թե ETF ֆոնդերը հավանության են արժանացել։ Ավելի ուշ հանձնաժողովը տեղեկացրել է, որ իր օգտահաշիվը կոտրել են։
ETF ֆոնդերի ակտիվները հասնում են տրիլիոնավոր դոլարների։ ԱՄՆ իշխանությունների որոշումը, վերլուծաբանների կարծիքով, կհանգեցնի բիթոքինի պահանջարկի աճի՝ կապված այն բանի հետ, որ ֆոնդերի արժեթղթերի ձեռքբերմամբ կիրականացվի կրիպտոարժույթի ուղիղ գնում, ինչը կազդի նրա փոխարժեքի վրա։
