Արհեստական բանականության (ԱԲ) հետագա զարգացումը կարող է հանգեցնել աշխատատեղերի կրճատման, ինչպես նաեւ անհավասարության խորացման աշխարհում։ Այսպիսի գնահատականներ է տվել Արժույթի միջազգային հիմնադրամի (ԱՄՀ) կարգադրիչ-տնօրեն Կրիստալինա Գեորգիեւան հաստատության կայքի իր բլոգում։
«ԱԲ-ն կարող է կրճատել աշխատատեղերի մոտ 40 տոկոսն ամբողջ աշխարհում՝ փոխարինելով աշխատողներին։ Մենք պետք է քաղաքական միջոցների մտածված հավասարակշռություն ստեղծենք, որպեսզի օգտագործենք նրա պոտենցիալը։ Մենք կանգնած ենք տեխնոլոգիական հեղափոխության շեմին, որը կարող է խթանել աշխատանքի արտադրողականությունը, արագացնել համաշխարհային տնտեսական աճը եւ բարձրացնել եկամուտներն ամբողջ աշխարհում։ Բայց այն կարող է նաեւ հանգեցնել աշխատատեղերի կրճատման եւ անհավասարության խորացման»,- ընդգծել է Գեորգիեւան։
Նրա խոսքով՝ ԱԲ զարգացման ազդեցությունը համաշխարհային տնտեսության վրա «դժվար է կանխատեսել», քանի որ այն տեղի է ունենալու «բարդագույն ձեւով»։ «Եզրակացություններն ապշեցնում են. աշխարհում զբաղվածության մոտ 40 տոկոսը ենթարկված է ԱԲ ներգործությանը»,- ավելացրել է հիմնադրամի տնօրենը։ Քանի որ ԱԲ-ն ազդում է բարձրորակ աշխատատեղերի վրա, շարունակել է Գեորգիեւան, «զարգացած տնտեսություն ունեցող երկրները բախվում են մեծ ռիսկերի», ինչպես նաեւ մեծ հնարավորությունների՝ ձեւավորվող շուկա ունեցող եւ զարգացող երկրների համեմատ։
Հիմնադրամի գնահատմամբ՝ «աշխատանքային եկամուտների վրա ազդեցությունը շատ բանով կախված կլինի այն բանից, թե ԱԲ-ն որքանով կօգնի բարձր եկամուտներ ունեցող աշխատողներին»։ «Եթե ԱԲ-ն էապես հեշտացնի բարձր եկամուտներ ունեցող աշխատողների աշխատանքը, դա կարող է հանգեցնել նրանց աշխատանքային եկամուտների անհամամասնական ավելացման։ Բացի այդ, աշխատանքի արտադրողականության աճը ԱԲ ներդնող ընկերություններում, հավանաբար, կհանգեցնի կապիտալի եկամտաբերության ավելացման, ինչը եւս կարող է նպաստավոր լինել բարձր եկամուտներ ունեցող աշխատողների համար»,- նշել է ԱՄՀ ղեկավարը։