Անհրաժեշտ է մեղմացնել առանց պարտադիր ապահովագրության վարելու համար նախատեսված տույժերը: Այս մասին հունվարի 15-ին Վարչական իրավախախտումների վերաբերյալ օրենսգրքում փոփոխությունների մասին օրինագծի քննարկման ժամանակ Ազգային ժողովի նիստում ասաց օրենսդրական նախաձեռնության հեղինակ, իշխող «Քաղաքացիական պայմանագիր» կուսակցության պատգամավոր Էդուարդ Աղաջանյանը։
Այսպես, Վարչական իրավախախտումների վերաբերյալ օրենսգրքի համաձայն՝ առանց պարտադիր ապահովագրության պայմանագրի (ԱՊՊԱ) տրանսպորտային միջոց վարելու համար նախատեսված է պատասխանատվություն՝ 100 հազար դրամի չափով։
Առաջարկվող փոփոխության համաձայն՝ վարչական իրավախախտում կատարելուց հետո 24 ժամվա ընթացքում իրավախախտման նշանները վերացնող անձը կազատվի տուգանքի 75 տոկոսի պարտադիր վճարումից։
Այսինքն՝ ԱՊՊԱ պայմանագիր չկնքած քաղաքացին նախկինի պես չի վճարի 100 հազար դրամ, այլ ընդամենը տուգանքի 25 տոկոսը (25 հազար դրամ)։
