Հայաստանի ՆԳՆ ղեկավար Վահե Ղազարյանը 44-օրյա պատերազմից հետո անհետացած գնդացիրների մասին անհասկանալի թվեր հնչեցրեց։ 

Հունվարի 15-ի ասուլիսում Հանրային հեռուստաընկերության թղթակիցը նախարարին հարց ուղղեց Լեռնային Ղարաբաղից, իբր,  բերված զենքի մասին, քանիսն է օրինական, քանիսը՝ ոչ, և քանիսն է հանձնվել իրավապահներին։

Ի պատասխան՝ նախարարը հայտարարեց զենքի կամավոր հանձնման ուղղությամբ աշխատանքներ իրականացնելու անհրաժեշտության մասին։ Այնուհետև նա զեկուցեց օպերատիվ որոշ տվյալների առկայության մասին, հատկապես՝ Լեռնային Ղարաբաղից ներկրված զենքի մասին։

«Ուզում եմ ասել, որ 2020 թվականի 44-օրյա պատերազմից հետո անհետացել է մոտ 17 հազար գնդացիր»,- ասաց նախարարը։ Ե՞րբ և որտեղ են անհետացել գնդացիրները, ի՞նչ հանգամանքներում, դրանք անհետացել են Լեռնային Ղարաբաղի՞, թե՞ Հայաստանի տարածքում, ում հաշվեկշռում են գտնվում անհետացած զենքերը, նախարարը չասաց։ Սակայն տեղեկատվության նման լղոզված ներկայացումը կարող է և դառնում է տարբեր տեսակի խեղաթյուրումների ու մեղադրանքների պատճառ, այդ թվում՝ Ադրբեջանի կողմից։