Հնդկաստանը մինչեւ 2030թ. կդառնա նավթի պահանջարկի աճի գծով համաշխարհային առաջատարը։ Այս ցուցանիշով ասիական երկիրը առաջ կանցնի Չինաստանից, տեղեկացրել է «Պրայմ»-ը՝ հղում կատարելով Միջազգային էներգետիկ գործակալության (ՄԷԳ) վերլուծաբանների նյութերին։
Ներկայում Չինաստանն է նավթի պահանջարկի աճի գծով համաշխարհային առաջատարը։ Սակայն առաջիկա վեց տարում ուժերի դասավորությունը երկու կարեւոր մրցակիցների միջեւ կփոխվի հօգուտ Հնդկաստանի։ «Հնդկաստանը Չինաստանից առաջ կանցնի որպես նավթի պահանջարկի աճի աղբյուր»,- ամփոփել են ՄԷԳ-ում։
Էներգետիկ շուկայի եւ անվտանգության դեպարտամենտի ղեկավար Կեյսուկե Սադամորին կարծում է, որ Հնդկաստանը լրիվ ի վիճակի է մինչեւ 2027թ. դառնալ նավթի պահանջարկի աճի գծով համաշխարհային առաջատար։ Հումքի արդյունահանումը Հնդկաստանում միջնաժամկետ հեռանկարում, համաձայն փորձագետների, կշարունակի իջնել։ Այս ֆոնին ասիական երկիրը ստիպված կլինի շեշտը դնել նավթի ներմուծումն ավելացնելու վրա։
2023թ. արդյունքներով՝ Հնդկաստանը եւ Չինաստանը դարձել են ռուսական հում նավթի ամենախոշոր ներմուծողները։ Առաջինին բաժին է ընկել բոլոր արտահանումների 40, երկրորդին՝ 45-50 տոկոսը, նշել է ՌԴ փոխվարչապետ Ալեքսանդր Նովակը։ Եվրոպական ուղղությամբ մատակարարումներն այդ ընթացքում, հակառակը, խիստ անկում են ունեցել՝ 40-45 տոկոսից հասնելով 4-5 տոկոսի։
