Անկախ Պետությունների Համագործակցության (ԱՊՀ) գծով գործընկերները շահագրգռված են Հարավային Կովկասում խաղաղության լիակատար վերականգնմամբ։ Այս մասին լրագրողներին ասել է ԱՊՀ գլխավոր քարտուղար, կազմակերպության դիտորդների առաքելության ղեկավար Սերգեյ Լեբեդեւը։
«Անկեղծ կասեմ, մենք՝ ձեր հարեւանները, ԱՊՀ գծով գործընկերները, նույնպես խիստ շահագրգռված ենք, որպեսզի Հարավային Կովկասում լիովին վերականգնվեն խաղաղությունը, կայունությունը եւ ստեղծվեն պայմաններ հետագա զարգացման համար։ Այս պայմաններում ակտիվ մասնակցություն են ցուցաբերում ոչ միայն Ռուսաստանի Դաշնությունը, այլեւ հարեւան պետությունները՝ Վրաստանը, Իրանը, Թուրքիան։ Եվ անկեղծորեն ցանկանում ենք, որպեսզի Հարավային Կովկասում խաղաղության եւ կայունության վերականգնման այդ հավաքական ջանքերը պսակվեն հաջողությամբ եւ որքան հնարավոր է շուտ»,- ավելացրել է նա։
