Եթե այն ժամանակ ասում էինք Եվրամիությո՞ւնն ուր, մեր տարածաշրջանը ուր, հիմա Եվրամիությունը փաստացի մեր տարածաշրջանն է. այդ առումով շատ կարևորում եմ Վրաստանի հետ ռազմավարական երկխոսության մեկնարկը: Այս մասին այսօր՝ փետրվարի 7-ին, ԱԺ-ում կառավարության հետ հարցուպատասխանին ասաց Նիկոլ Փաշինյանը՝ պատասխանելով «Քաղաքացիական պայմանագիր» խմբակցության պատգամավոր Ալխաս Ղազարյանի հարցին, թե արդյո՞ք Վրաստանի հետ օրեր առաջ կնքված ռազմավարական գործընկերության հաստատման մասին հռչակագիրը Հայաստանի և Վրաստանի միջև ռազմավարական հարաբերությունների նոր փուլի մեկնարկ կարող է դառնալ:
Նիկոլ Փաշինյանի խոսքով, մեր տարածաշրջանում շատ էական իրողություններ են փոխվել, և դրանցից մեկը Վրաստանի՝ Եվրամիության անդամության թեկնածուի կարգավիճակ ստանալն է: Ստացվում է, որ մեր հարևան երկրներից երկուսը ունեն Եվրամիության անդամության թեկնածուի կարգավիճակ:
«Ինչ վերաբերում է հայ-վրացական ռազմավարական գործընկերության հռչակագրին, կարող եմ ասել, որ այնտեղ, ըստ էության, նախատեսված են բոլոր ուղությունները, և սա արտահայտել է 2 երկրների կառավարությունների կամքը՝ այդ ողջ օրակարգով գնալ առաջ»,-ասաց վարչապետը:
