2018-ից մեր օրակարգում է թվայնացման հարցը. ես տասնյակ խորհրդակցություն եմ արել, մասնագետներին խնդրել եմ բացատրել՝ թվայնացումն ինչ է եւ ինչի համար է: Այս մասին, այսօր՝ փետրվարի 8-ին, կառավարության նիստում հայտարարեց վարչապետ Նիկոլ Փաշինյանը։
«Ես այդ խորհրդակցություններին, ամենայն հարգանքով բոլորի հանդեպ, դուրս եմ եկել դմբրած եւ հասկանալով, որ ես ոչինչ չհասկացա: Ասել եմ՝ տարբերակ չկա՞ այդ հարցի պատասխանները ձեւակերպել մեկ էջի վրա: Ամեն հարցի պատասխանը 22 հատոր է: վերջը հարցրեցի՝ Ո՞րն է առաջատար երկիրը թվայնացման ոլորտում: Ասացին՝ Էստոնիան: Ասեցինք՝ կարո՞ղ է Էստոնիայից մարդ հրավիրել, որ բացատրի, թե թվայնացումն ինչ է: Էդ մարդիկ եկան եւ մեկ ժամում բացատրեցին՝ ինչ է թվայնացումը եւ ես այլեւս որեւէ հարց չունեի: Սա իրողություն է»,-ասաց Փաշինյանը:
Նա նշեց, որ «ակադեմիական քաղաքի» ծրագրի դեպքում այլեւս 22 հատ խորհրդակցություն անելու կարիքը չկար, միանգամից հրավիրել են միջազգային փորձագետների. «Հիմա մեր գործընկերները այդ պրոյեկտը դնում են մի ռելսերի վրա, որ հետո եթե անգամ ուզենանք չիրականացնել, չենք կարող: Որովհետեւ «Ակադեմիական քաղաքի» գնացքն արդեն գնացել է, էլ կանգնացնել չի լինի: Աշշատանքի մեթոդը էս ա: Մենք մինչեւ քաշում-քաշքշում ենք, շաղգամը չենք կարողանում ի վերջո, հողից հանել: Լավ չի, որ այդպես է, բայց սա մեր իրողությունն է, որը պետք է խոստովանենք»,-ասաց Փաշինյանը:
