Մոլդովայի խոհրդարանի նախագահ Իգոր Գրոսուն հայտնել է, որ Քիշնեւը կարող է Եվրամիություն մտնել մինչեւ 2030թ։ Նա այսպիսի ժամկետ է նշել digi24.ro ռումինական պարբերականի հարցազրույցում։
Նա հիշեցրել է, որ պետության ղեկավար Մայա Սանդուն նպատակ է հայտարարել մինչեւ 2030թ. ԵՄ-ին անդամակցելը։
«Դա այն նպատակն է, որը մենք դրել ենք մեր առջեւ։ Ես աջակցում եմ այդ նպատակին, բայց եւ միաժամանակ գործընկերներիս ասել եւ ասում եմ բոլորին, որ մենք ձգտելու ենք արագացնել այդ գործընթացը»,- ասել է Գրոսուն։
Նրա խոսքով՝ Մոլդովայում, Ուկրաինայում եւ ամբողջ Եվրոպայում նկատվում է արագացված դինամիկա, իրադարձությունները զարգանում են շատ արագ, ինչը չկար տասը տարի առաջ։
«Մենք պետք է ադապտացվենք, հնարավորություններ գտնենք նաեւ այս դժվար իրավիճակում... 2022թ. մենք ստացանք թեկնածու երկրի կարգավիճակ, իսկ 2023-ին սկսեցինք բանակցությունները»,- ընդգծել է Գրոսուն։
Դեկտեմբերի 24-ին Մոլդովայի նախագահ Մայա Սանդուն երկրի խորհրդարանին առաջարկել է կազմակերպել հանրաքվե, որպեսզի պարզվի քաղաքացիների կարծիքը Եվրամիությանը հանրապետության անդամակցության մասին։
2023թ. վերջին խորհրդարանի պատգամավորները հավանություն տվեցին Ընտրական օրենսգրքի փոփոխություններին, որոնց համաձայն՝ հանրաքվեն կարող է տեղի ունենալ խորհրդարանական եւ նախագահական ընտրությունների օրը։
