Ստեփանավան քաղաքի մոտ գտնվող «Արտակարգ իրավիճակների օդանավակայան» ԲԸ-ն հանվել է 2017-2020թթ. մասնավորեցման ենթակա պետական գույքի ցուցակից։ Այս մասին Ազգային ժողովում, «2017-2020թթ. պետական գույքի մասնավորեցման ծրագրի մասին» օրենքում երկրորդ եւ վերջնական ընթերցմամբ փոփոխութուններ մտցնելու մասին օրինագծի քննարկման ժամանակ, մարտի 19-ին, ասել է տարածքային կառավարման եւ ենթակառուցվածքների նախարարության պետական գույքի կառավարման կոմիտեի նախագահ Առնակ Ավետիսյանը։
Օդանավակայանը, պաշտոնյայի խոսքով, չի գործում արդեն երկար ժամանակ։ Ընկերությանը պատկանող անշարժ գույքը՝ 61,7 հեկտար հողամասն ու դրա վրա գտնվող կառույցները, հիմնականում լիովին քանդված են։
Ավելի վաղ ընդունվել էր որոշում «Արտակարգ իրավիճակների օդանավակայան» ՓԲԸ-ն պաշտպանության նախարարությանը հանձնելու մասին։ Կառավարության որոշումը, կոմիտեի ղեկավարի հավաստիացմամբ, ուղղված է օդանավակայանի գործունեության վերականգնմանը։ Դա, կառավարության կարծիքով, կնպաստի ընդհանուր նշանակության ավիացիայի եւ ներքին ուղեւորափոխադրումների զարգացմանը։ Հիմք է հանդիսանում 2023թ. փետրվարի 14-ի ՀՀ ՊՆ նամակը՝ հասցեագրված տարածքային կառավարման եւ ենթակառուցվածքների նախարարությանը, ինչպես նաեւ փոքր ավիացիայի եւ օդանավակայանների զարգացման պլանները։
Օդանավակայանը գտնվում է Վրաստանի սահմանից 20 կիլոմետր հեռու։