Ամերիկուհի Լորնա Բիչ-Մատուրան հայց է ներկայացրել Նյու Յորքի քաղաքապետ Էրիկ Ադամսի դեմ, որում նրան մեղադրել է սեռական ոտնձգությունների մեջ, որոնք, նրա խոսքով, տեղի են ունեցել 1993թ., տեղեկացրել է Newsweek ամսագիրը։

Ամսագրի տվյալներով՝ Ադամսը եւ  Բիչ-Մատուրան այն ժամանակ աշխատել են Նյու Յորքի քաղաքային ոստիկանությունում։ Կինը նշել է, որ ապագա քաղաքապետը փորձել է իրեն ինտիմ պարտադրել՝ կարիերային աճին նպաստելու դիմաց։ Իր հայցում Բիչ-Մատուրան պահանջում է վնասի փոխհատուցում 5 մլն դոլարի չափով։ Նա պնդում է, որ 2023թ. աշնանը իրեն հայտնի է դարձել, որ Նյու Յորքում ընդունվել է օրենք, որը թույլ է տալիս սեռական բռնության զոհերին ոստիկանություն դիմել ոտնձգությունից տարիներ հետո, դրա համար էլ նա իրեն պարտավորված է զգացել բացահայտել Ադամսի հակաօրինական գործողությունները։

«Քաղաքապետը հերքում է այս վրդովեցուցիչ մեղադրանքները եւ հայցում նկարագրված դեպքերը։ Մենք ակնկալում ենք, որ դատարանը նրան կարդարացնի»,- ասել է Նյու Յորքի յուրիսկոնսուլտ Սիլվիա Հինդս-Ռադիկսը։ Նրա կարծիքով՝ 1993թ. Ադամսը «ռասիզմի ամենահայտնի հրապարակային հակառակորդներից մեկն էր Նյու Յորքի ոստիկանությունում» եւ չէր կարող որեւէ ազդեցություն ունենալ քաղաքացիական ծառայողների ծառայողական առաջխաղացման հարցում, իսկ նման պնդումները «ծիծաղաշարժ» են։