Google-ը ֆրանսիական հակամենաշնորհային ծառայությունից 250 մլն եվրոյի չափով նոր տուգանք է ստացել 2022 թվականի հունիսին ստանձնած պարտավորությունները չկատարելու համար, գրում է Коммерсант-ը։

Խոսքը հարակից իրավունքների մասին օրենքը չպահպանելուն է վերաբերում։ Այդ որոշումն ընդունվել է Ֆրանսիայում 2019թ: Համաձայն օրենքի՝ ինտերնետ ընկերությունները պարտավոր են փոխհատուցում վճարել հրատարակիչներին և լրատվամիջոցներին՝ իրենց բովանդակության օգտագործման համար։

2020 թվականին ֆրանսիական կարգավորիչը Google-ի վրա առաջին անգամ սահմանափակումներ է մտցրել՝ որոշակի գործողությունների արգելքի տեսքով, քանի որ համարել է, որ ընկերությունը չի հետևում սահմանված կանոններին։ 2021 թվականին ամերիկյան կորպորացիան հակամենաշնորհային ծառայությունից ստացել է 500 միլիոն եվրո տուգանք։

Երկու տարի առաջ Ֆրանսիան դադարեցրեց բոլոր դատական գործընթացները Google-ի դեմ, քանի որ համարեց, որ ընկերության ստանձնած պարտավորությունները բավարար են գործերը դադարեցնելու համար: Այնուամենայնիվ, Ֆրանսիայի մրցակցային մարմինն այժմ որոշել է, որ Google-ը չի կատարել 2022 թվականի հունիսին ստանձնած յոթ պարտավորություններից չորսը: