Պակիստանի հյուսիս-արևմուտքում մահապարտ ահաբեկիչը մեքենայով մխրճվել է չինացի ինժեներների շարասյան մեջ, ինչի հետևանքով վեց մարդ է զոհվել, հայտնել է Reuters գործակալությունը՝ վկայակոչելով Պակիստանի ոստիկանությանը:
Պակիստանի շրջանային ոստիկանության ղեկավար Մոհամմադ Ալի Գանդապուրին նշել է, որ չինացի ինժեներները Իսլամաբադից մեկնում էին Խայբեր Փախթունխվա նահանգի Դասու ամբարտակի շինհրապարակում տեղակայված իրենց ճամբար:
«Հարձակման հետևանքով զոհվել են Չինաստանի հինգ քաղաքացի և նրանց պակիստանցի վարորդը», - գործակալությանը հայտնել է Գանդապուրը:
Խոշոր ամբարտակի կառուցման վայր Դասուն նախկինում ևս հարձակման է ենթարկվել: Մասնավորապես, 2021 թվականին ավտոբուսի պայթյունի հետևանքով զոհվել էր 13 մարդ, որոնց թվում՝ Չինաստանի ինը քաղաքացի։
Չինացի ինժեներները Պակիստանում աշխատում են մի շարք նախագծերի վրա, իսկ Պեկինը, Չինաստան-Պակիստան տնտեսական միջանցքի (CPEC) շրջանակում, ավելի քան 65 միլիարդ դոլար ներդնում է արել ենթակառուցվածքային աշխատանքներում՝ որպես Պեկինի «Գոտի և ճանապարհ» ընդլայնված նախաձեռնության մաս:
Հարձակման պատասխանատվությունը ոչ ոք չի ստանձնել։ Սա հարավասիական երկրում մեկ շաբաթվա ընթացքում երրորդ խոշոր հարձակումն է չինական շահերի նկատմամբ:
Առաջին երկու հարձակումները եղել են Պակիստանի ռազմածովային ավիաբազայի և Չինաստանի կողմից հարավ-արևմտյան Բելուջիստան նահանգում օգտագործվող ռազմավարական նավահանգստի վրա, որտեղի ենթակառուցվածքային նախագծերում Պեկինը միլիարդներ է ներդնում: