Միացյալ Նահանգներն իրականացրել է օդով հումանիտար օգնության հերթական խմբաքանակի առաքումը Գազայի հատվածի հյուսիսային մաս։ Այս մասին տեղեկացրել է ԱՄՆ Զինված ուժերի կենտրոնական հրամանատարությունը (CENTCOM)։
«Կենտրոնական հրամանատարությունը իրականացրել է հումանիտար օգնության առաքում Գազայի հյուսիսային մաս մարտի 31-ին, շարունակվող հակամարտությունից տուժած բնակչությանն աջակցելու համար»,- նշվել է հայտարարությունում, որը հրապարակվել է կիրակի հրամանատարության X-ի էջում։ Ամերիկյան ինքնաթիռները նետել են ավելի քան 50 հազար բաժին պատրաստի սնունդ։
Իրավիճակը Մերձավոր Արեւելքում խիստ սրվել է 2023թ. հոկտեմբերի 7-ին Գազայի հատվածից իսրայելական տարածք ՀԱՄԱՍ-ի զինյալների ներխուժումից հետո, որն ուղեկցվել է սահմանամերձ բնակավայրերի բնակիչների սպանություններով եւ ավելի քան 240 մարդու պատանդառմամբ։ Արմատականները գրոհն անվանել են Երուսաղեմի Ալ-Աքսա մզկիթի դեմ իսրայելական իշխանությունների գործողությունների պատասխանը։ Իսրայելը հայտարարել է Գազայի լիակատար շրջափակման մասին եւ սկսել հարվածներ հասցնել Գազայի հատվածին եւ Լիբանանի ու Սիրիայի որոշ շրջաններին, ինչից հետո ցամաքային գործողություն է սկսել անկլավում։ Բախումներ են տեղի ունենում նաեւ Հորդանան գետի Արեւմտյան ափին։
