![](img/news/81/60/70/default.jpg)
Իսրայելի պաշտպանության բանակի հրամանատարությունը որոշել է ժամանակավորապես չեղարկել բոլոր մարտական ստորաբաժանումների զինծառայողների արձակուրդները։ Այս մասին Telegram ալիքով հայտնել է բանակի մամուլի ծառայությունը։
«Իրավիճակի գնահատման հիման վրա որոշվել է, որ ժամանակավորապես կդադարեցվի արձակուրդը Իսրայելի բոլոր մարտական ստորաբաժանումների համար։ Իսրայելի պաշտպանության բանակը գտնվում է պատերազմական վիճակում, և ուժի տեղակայման հարցը գտնվում է մշտական գնահատման տակ՝ անվտանգության պահանջներին համապատասխան»,- նշում է հրատարակությունը։
Նախօրեին իսրայելցի անանուն պաշտոնյան տեղական i24 News հեռուստաալիքին ասել էր, որ Իսրայելը պատրաստվում է Իրանի կողմից հնարավոր պատասխան հարվածի` Դամասկոսում Իրանի հյուպատոսության վրա իսրայելական ուժերի հարձակումից հետո:
Նախկինում հաղորդվում էր, որ իսրայելական բանակը կուժեղացնի իր հակաօդային պաշտպանությունն Իրանի կողմից հարձակման սպառնալիքի ֆոնին։ Իրավիճակը գնահատելուց հետո Իսրայելի պաշտպանության բանակը որոշել է ընդլայնել իր անձնակազմը և ներգրավել պահեստային անձնակազմ՝ հակաօդային պաշտպանության համակարգի ամրապնդման համար։