Երեւանում ակցիաները շարունակվում են՝ ի աջակցություն տավուշցիների։
«Տավուշը հանուն հայրենիքի» ֆեյսբուքյան էջում հրապարակվել են լուսանկարներ, որոնցում մարդիկ հեգնական գրառումներով պաստառներ են կպցրել քաղաքի տարբեր հատվածներում։
Մասնավորապես, պաստառների վրա գրված է. «Սաղ տանք, խախանդ ապրենք», «Լռեք, թող հանձնի», Մի խանգարեք, թող հանձնի», «Թողեք, թող հանձնի», «Հանձնենք, հանգիստ ապրենք»:
Ֆեյսբուքյան գրառվամ մեջ ասվում է. «Մայրաքաղաքում լույսն այսպես բացվեց: Սա միայն Տավուշի խնդիրը չէ, սա ողջ հայության ու Հայաստանի հարցն է
Պայքար. Օր 11: Ստի և կեղծիքի դեմ պայքարը շարունակվում է` հանուն ճշմարտության և արդարության»:
Հիշեցնենք, որ Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։
Առավոտյան քաղաքացիները, ի աջակցություն տավուշցիների, բեռնատարներով փակել էին Միասնիկյան պողոտան:
