ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ՛Բրայենը պաշտոնական այցով ժամանել է Թբիլիսի, հայտնում է NewsGeorgia-ն։
Այցը տեղի է ունենում Վրաստանում օտարերկրյա գործակալների մասին օրենքի ընդունման ֆոնին։ ԱՄՆ-ն և ԵՄ-ն այն համարում են դեմոկրատական արժեքներին հակասող։ Օրենքն ուղղված է անկախ լրատվամիջոցների և քաղաքացիական հասարակության դեմ, նշում են նրանք։
Պետքարտուղարությունը նշել է, որ Օ'Բրայենի այցի նպատակն է ցույց տալ «Միացյալ Նահանգների շարունակական նվիրվածությունը վրաց ժողովրդին և Վրաստանի ձգտումները խաղաղ, բարգավաճ և ապահով եվրատլանտյան ապագայի համար»:
Նշվում է, որ պետքարտուղարի օգնականը հանդիպումներ է ծրագրել Վրաստանի ընդդիմադիր կուսակցությունների, քաղաքացիական հասարակության կազմակերպությունների և կառավարության ներկայացուցիչների հետ։ Կոնկրետ անձանց անուններ չեն նշվում։
Երկուշաբթի օրը վարչապետ Իրակլի Կոբախիձեն ասել է, որ Բիձինա Իվանիշվիլին՝ իշխող «Վրացական երազանք» կուսակցության պատվավոր նախագահ և միլիարդատեր հիմնադիրը, որին քննադատներն անվանում են «ռուս օլիգարխ», հրաժարվել է հանդիպել Օ՛Բրայենի հետ։
Ըստ Կոբախիձեի՝ պատճառն այն է, որ Իվանիշվիլին արդեն «դե ֆակտո պատժամիջոցների տակ է» և «շանտաժի տակ չի կարող ոչ մի հանդիպում անցկացնել»։ «Վրացական երազանք»-ն Իվանիշվիլիի հաշիվների 2 միլիարդ դոլարի սառեցումը համարում է «դե ֆակտո պատժամիջոցներ»՝ կապված այդ միջոցների հնարավոր ռուսական ծագման հետ։ Վրաստանի վարչապետը վստահեցրել է, որ Իվանիշվիլին կփոխի իր դիրքորոշումը, եթե «դե ֆակտո պատժամիջոցները» չեղարկվեն։
ԱՄՆ Պետքարտուղարությունում Օ՛Բրայենը զբաղեցրել է պատժամիջոցների համակարգողի պաշտոնը մինչև 2023 թվականի հոկտեմբերը։ Այս կարգավիճակով նա անցած ամառ այցելեց Վրաստան։ Այն ժամանակ Վաշինգտոնն ընդգծել էր, որ Վրաստանն այն երկրների թվում է, որոնք խնդիր են դնում Ռուսաստանի կողմից պատժամիջոցներից խուսափելու տեսանկյունից։
