Վարշավան դիտարկում է իր ՀՕՊ համակարգերի օգտագործման հնարավորությունը Ուկրաինայի սահմանամերձ շրջաններում ռուսական հթրիռները խփելու համար, ասել է Լեհաստանի արտաքին քաղաքական գերատեսչության խոսնակ Պավել Վրոնսկին։
«Այդ հարցը դիտարկվում է իրավաբանական եւ տեխնիկական տեսակետից, բայց ոչ մի որոշում այդ գործով չկա»,- ասել է նա «Укринформ»-ի հարցազրույցում՝ ավելացնելով, որ ուկրաինական կողմը դիմել է Լեհաստանին նման նախաձեռնությամբ։
Ըստ նրա՝ խոսքը Լեհաստանում ՀՕՊ համակարգերի օգտագործման մասին է, այլ ոչ թե դրանք Ուկրաինային հանձնելու։ Քննարկումն սկսվել է մարտի 24-ից հետո, երբ Ռուսաստանի հեռահար ավիացիայի արձակած հրթիռը անցել էր Լեհաստանի տարածքի վրայով։ Վրոնսկին ավելացրել է, որ Վարշավայում քննարկում են ՀՕՊ օգտագործման հնարավորությունը նման հրթիռների ոչնչացման համար եւ այդ քայլի իրավաբանական հետեւանքները։
Ապրիլի 20-ին բրազիլացի լրագրողների հարցազրույցում Ուկրաինայի նախագահ Վլադիմիր Զելենսկին ՆԱՏՕ երկրների ավիացիային առաջարկել էր խփել ռուսական հրթիռները։
«Եթե այդ ավիացիան բարձրանա մեր հարեւան երկրների տարածքում եւ խփի հրթիռները, որոնք թռչում են Ուկրաինա, բայց կարող են թռչել նաեւ այս տարածք, ինչպես արդեն գրանցվել են փաստեր Լեհաստանում եւ Ռումինիայում, ապա թող նրանք խփեն այդ հրթիռները, եւ ես միայն կծափահարեմ»,- ասել է Զելենսկին։