![](img/news/82/49/76/default.jpg)
Երկրի կոնկրետ մակերեսի նշումը նշանակում է կամավոր սահմանափակում սահմանազատման եւ սահմանագծման գործընթացում։ Այս մասին Ազգային ժողովում, ավանդական ճեպազրույցներում, մայիսի 23-ին ասել է «Հայաստան» ընդդիմադիր խմբակցության ղեկավար Սեյրան Օհանյանը։
Նրա խոսքով՝ Հայաստանն ու Լեռնային Ղարաբաղը միասին ունեին 42 հազար քառակուսի կիլոմետր տարածք։ Լեռնային Ղարաբաղի մակերեսը կազմում էր մոտ 12 հազար քառակուսի կիլոմետր։ «Եվ այս իշխանությունը հանձնեց Արցախը։ Հայաստանի վարչապետ Նիկոլ Փաշինյանը մինչեւ հիմա հայտարարում էր, որ երկրի մակերեսը 29,8 հազար քառակուսի կիլոմետր է, եւ որ իրենք ճանաչում են Հայաստանի տարածքը միլիմետրերով։ Պարզվում է, որ ոչ թե 29,8 է, այլ 29,743։ Ընդ որում՝ փաստացի այսօրվա դրությամբ մեր վերահսկողության տակ է մնացել ընդամենը 29,5 հազար քառակուսի կիլոմետր»,- ասել է Օհանյանը։
Պատգամավորը համոզված է, որ մակերեսը նշելը պետք է երկկողմանի լինի։ Այսինքն՝ Ադրբեջանը նույնպես պետք է հնչեցնի իր մակերեսի չափը։ «Այսօրվա դրությամբ Ադրբեջանը հավակնում է 114 հազար քառակուսի կիլոմետրի։ Հենց այդ պատճառով Բաքուն չի նշում որեւէ կոնկրետ տարածք։ Չէ՞ որ վերոնշյալ տարածքների մոտ 14 000 քառակուսի կիլոմետրն այսօրվա դրությամբ պատկանում է Հայաստանին»,- պարզաբանել է խմբակցության ղեկավարը։