Վրաստանի վարչապետ Իրակլի Կոբախիձեն նախագահ Սալոմե Զուրաբիշվիլիին «դավաճան» է անվանել՝ Վրաստանի Անկախության օրվան նվիրված տոնական միջոցառմանը իր ելույթի ժամանակ։

Նա նշել է, որ վերջին 34 տարվա ընթացքում Վրաստանն անցել է բազմաթիվ փորձությունների միջով, այդ թվում՝ «փաստացի անկախության» կորստով (հղում Վրաստանի երրորդ նախագահ Միխեիլ Սաակաշվիլիի թիմի կառավարման տարիներին - խմբ.), տեղեկացնում է SOVA-ն։

Կոբախիձեն նշել է այդ ժամանակահատվածում «քաղաքական գործիչների դավաճանությունը» և Վրաստանի ժողովրդի «անփորձությունը»։

«90-ականների սկզբին մենք երեք պատերազմ ենք անցել. 2004-2012 թվականներին մենք ապրեցինք փաստացի անկախության կորուստ։ Ավտորիտարիզմ, գործակալների կառավարում։ Հասարակության անփորձությունն ու քաղաքական գործիչների դավաճանությունը մեր երկրին արժեցել են նրա տարածքների 20%-ի ժամանակավոր կորուստը։ 2012 թվականից ի վեր մենք փորձել ենք կասեցնել Վրաստանի ինքնիշխանությունն ու անկախությունը խաթարելու փորձերը, հատկապես վերջին չորս տարվա ընթացքում»,- ասել է նա։

Կոբախիձեն ընդգծել է, որ այսօր էլ Վրաստանը կանգնած է մարտահրավերների առջև, սակայն, նրա խոսքով, իշխանությունը «խելամիտ» կառավարության ձեռքում է։

«Ժողովրդի և նրա իշխանությունների միասնությունը, ինչպես նաև խելամիտ քայլերը թույլ են տվել մեզ վերջին երկու տարվա ընթացքում պահպանել խաղաղությունը երկրում՝ չնայած գոյաբանական սպառնալիքներին և բազմակողմ դավաճանությանը, այդ թվում՝ Վրաստանի նախագահի դավաճանությանը», - եզրափակել է նա։