Լեռնային Ղարաբաղում տեղի է ունեցել սեմինար-խորհրդակցություն «խոզի գրիպ»-ի դեմ պայքարի հարցերով՝ ԼՂՀ առողջապահության նախարար Արմեն Խաչատրյանի, Հայաստանի առողջապահության նախարար Հարություն Քուշկյանի, ոլորտի պատասխանատու աշխատակիցների մասնակցությամբ:
Նախարարները ներկաներին մի շարք ցուցումներ են տվել վտանգավոր վարակի ներխուժումը կանխելու վերաբերյալ: Նշվել է, որ այսօր Հայաստանում ստեղծվում է հակահամաճարակային վերահսկողության նոր համակարգ, հանրապետության բոլոր անցակետերում խստացվել է վերահսկողությունը:
Հայաստանի առողջապահության նախարարության ներկայացուցիչներն իրենց հետ հիվանդության դեմ պայքարի տեղեկատուներ էին բերել: Տարեվերջին Հայաստանում ստեղծվելու են արագ արձագանքման խմբեր: Վերապատրաստման համար Երեւան են հրավիրվելու մասնագետներ ԼՂՀ-ից:
Հիշեցնենք, որ Հայաստանում արդեն «խոզագրիպ»-ի վարակման երեք դեպք է գրանցվել՝ երկուսը՝ՀՀ քաղաքացիների, մեկը՝ Իրանի քաղաքացու մոտ: Իրանի քաղաքացին արդեն լքել է Հայաստանի տարածքը, իսկ Էջմիածնի երկու բնակիչները գտնվում են հիվանդանոցում: Ինչպես վստահեցրել է Հայաստանի առողջապահության նախարար Հարություն Քուշկյանը, հանրապետությունն այսօր լիովին պատրաստ է դիմագրավել «խոզի գրիպ»-ին:
