Ուկրաինայի նախագահ Վիկտոր Յուշչենկոն հայտարարել է, որ երկրում «խոզի գրիպ»-ի համաճարակի պատճառով հունվարի 17-ին նախատեսված նախագահական ընտրությունների ժամկետը չի փոփոխվի: «Ընտրողը պետք է պատրաստ լինի հունվարի 17-ին գնալ ընտրությունների եւ հայտնել իր դիրքորոշումը»,- հեռուստատեսությամբ հայտարարել է Յուշչենկոն ու հավելել, որ ընտրությունները թեստ են ժողովրդի համար: Մեկնաբանելով խոսակցությունները համաճարակի հետ կապված երկրում արտակարգ դրություն հայտարարելու մասին, նա ասել է. «Խոսք մի տվեք քաղաքական գործիչներին ոչ գրիպի, ոչ էլ որեւէ հիմարության վերաբերյալ»:
«Գալիս է ժամանակը, երբ անհրաժեշտ է կոնկրետանալ սեփական ընտրության հարցում, երկրի ու սեփական ճակատագրի հարցում: Ուստի ես մանիպուլյացիաների չեմ դիմի եւ կարանտին կամ արտակարգ դրություն չեմ խաղա»,- հայտարարել է նախագահը:
Նշենք, որ ավելի վաղ նախագահի քարտուղարության ղեկավարի տեղակալ Իգոր Պոպովը եւ ազգային անվտանգության եւ պաշտպանության խորհրդի քարտուղար Ռաիսա Բոգատիրյովան չէին բացառել երկրում արտակարգ դրության հայտարարումը՝ կապված «խոզի գրիպ»-ի համաճարակի հետ: Այդ դեպքում, ըստ Պոպովի, պետք է նախագահական ընտրությունները տեղափոխել մայիսի 30-ին` տեղական ընտրությունների օրը: Սակայն Յուշչենկոն հայտարարել է, որ արտակարգ դրություն հայտարարելու համար հիմքեր չկան: Հավելենք նաեւ, որ ընտրությունների օրը տեղափոխելու դեմ է արտահայտվել նաեւ երկրի վարչապետ Յուլիա Տիմոշենկոն, որը համարվում է այդ ընտրությունների անցողիկ թեկնածուներից մեկը:
