A/H1N1 վարակով հիվանդացածների թիվը Հայաստանում աճում է: Ինչպես NEWS.am-ին հայտնեց առողջապահության նախարարի օգնական Շուշան Հունանյանը, նախօրեին «խոզագրիպով» վարակման նոր դեպք է արձանագրվել, հիվանդը տեղափոխվել է Նորքի ինֆեկցիոն հիվանդանոց «Զվարթնոց» օդանավակայանից: «Խոզի գրիպով» վարակվածը Թուրքիայի քաղաքացի է, ազգությամբ թուրք, որը Երեւանից մեկնում էր Ստամբուլ: Հունանյանի խոսքերով, ներկայումս Նորքի հիվանդանոցում ստացիոնար բուժօգնություն են ստանում 5 տղամարդ, նրանց առողջական վիճակն անհանգստանալու տեղիք չի տալիս: Ավելին, ինչպես նշեց Հունանյանը, «խոզագրիպով» առաջին վարակվածները՝ Վաղարշապատի 2 բնակիչները, այսօր կամ վաղը դուրս կգրվեն հիվանդանոցից:
Նշենք, որ Հայաստանում ընդհանուր առմամբ արձանագրվել է «խոզագրիպի» 6 դեպք, երկուսը Իրանի քաղաքացի են, մեկը՝ Թուրքիայի, եւ երեքը՝ Հայաստանի: Ներկայումս հանրապետությունում բուժումը շարունակում են հինգ հիվանդներ, Իրանի քաղաքացիներից մեկը՝ վարորդը, առաջին իսկ օրը լքել է Հայաստանը: Նշենք նաեւ, որ Երեւանի դեղատներում նախկինի պես բժշկական դիմակների, սովորական սեզոնային գրիպի դեմ պայքարի միջոցների սուր դեֆիցիտ է նկատվում: «Տամիֆլյու» դեղամիջոցը միայն մի քանի դեղատներից կարելի է գտնել: Ինչ վերաբերում է «խոզագրիպի» դեմ պատվաստանյութին, այն Հայաստան դեռ չի բերվել, սակայն առողջապահության նախարար Հարություն Քուշկյանի խոսքերով, առաջիկայում անպայման ներկրվելու է Հայաստան: